Ka zgjatur shumë pak liria e Sokol Sinomatit i njohur ndryshe me nofkën “Buzëderri”, i cili u lirua nga burgu nga amnistia penale, për tu arrestuar disa orë më vonë nga Policia.
Burime për mediat bëjnë me dije se Sinomati është arrestuar pasi ndaj tij ka një vendim të drejtësisë italiane, që e ka dënuar me 12 vjet burg për trafik droge.
Ende nuk dihet se përse urdhri nuk është zbatuar më parë, por fillimisht Sinomati është liruar dhe më pas është arrestuar.
Kush është Sokol Sinomati?
Sokol Sinomati, ka qenë pjesë e bandës së “Gaxhait” në vitin 1997 në Vlorë. Ai ishte i dënuar për vrasjen e ndodhur në 3 janar të vitit 2000, ku gjatë një tentative për të ekzekutuar Sokol Nuho, ka qëlluar gabimisht Luigj Xhafën, kalimtar të rastit.
Në 2014 gjykata e Lartë atëherë me relator Edmond Islamaj vendosën që Armando Sulejmani (Cipuri) dhe Sokol Sinomati – të dy ushtarë të Gaxhait – të mos dënoheshin me burgime përjetë si pjesëmarrës në bandën e armatosur të Gaxhait, por të dënoheshin përfundimisht me akuzën e “Vjedhjes me dhunë” në bashkëpunim, duke u dënur përfundimisht me 16 vite burgim. Ky vendim solli lirimin e tyre nga qelia,edhe pse ishin të akuzuar dhe dënuar për një tjetër vrasje të kryer në Vlorë, në vitin 2002 në Skelë, ku i vdekur mbeti Elton Tato.
Pas lirimit, ai u largua nga Shqipëria në vitin 2017-n, drejt Belgjikës, ku sërish merrej me aktivitet të paligjshëm dhe u arrestua aty në vitin 2021, për çështje droge. Në fund të vitit 2022 ai u ekstradua në Tiranë, për ngjarjen e regjistruar në vitin 2002-in në Skelë, ku i vrarë mbeti Elton Tato dhe u plagos Robert Boraku
Edhe i biri Gëzim Sinomati jetonte në Belgjikë, teksa kishte ardhur në vendin tonë dy herë brenda muajit, sepse i vdiq gjyshja dhe siç duket kishte vendosur të priste edhe të atin, që thuhet se do të dilte nga burgu për pak ditë, pasi i përfundonte dënimi.
Por, kundërshtarët, vepruan shpejt dhe e ekzekutuan dy ditë më parë, edhe pse ka dyshime se autorët mund të kenë ngatërruar shënjestër. Dyshohet se ata mund të kishin si qëllim të vrisnin xhaxhain e viktimës, Benard Sinomati, vëllai i Sokolit, i cili ndodhej në të njëjtën banesë. Edhe ky i fundit jetonte në Belgjikë dhe kishte dy muaj që kishte ardhur në Shqipëri.
