Kryetarja e Komisionit Hetimor Parlamentar për koncesionet në shëndetësi (sterilizimi dhe check up-i), deputetja Albana Vokshi ka akuzuar socialistët se me urdhër të kryeministrit Edi Rama po bllokojnë kërkesat për informacion dërguar institucioneve.
Në një kërkesë për mediat, Vokshi deklaroi se në mbledhjen e djeshme socialistët zhbënë vendimet e marra në mbledhjet e kaluara ku ata i kanë bojkotuar dhe sërish ditën e djeshme refuzuan të miratonin kërkesat për informacion. Ajo tha më tej se ekspertët e PS-së kanë qenë bashkëpunues, por ditën e djeshme bllokuan komisionin.
Sipas Vokshit, socialistët refuzuan të lexonin në mbledhje edhe planin e propozuar vetë, ku sipas saj, është vetëm një plan për të bllokuar komisionin hetimor. Ajo tha më tej se deputeti socialist Plarent Ndreca ka fyer dhe intimiduar ekspertët, teksa paralajmëroi padi për shpërdorim detyre ndaj tij.
Vokshi: Koncesionet, abuzimet me to kanë sjellë pasoja të rënda për shëndetin dhe jetën e qytetarë e shqiptarë. Mes dhjetëra bojkoteve, PS dje kishte përgatitur një tjetër plan bllokimi. Që dje hodhi planin 3 javor, pa pasur asnjë justifikim për të bojkotuar mbledhjen. Më pas rrëzuan kërkesat për informacion, të cilat janë hapi i parë për hetimin parlamentar. Ka një muaj që PS, deputetët e saj, me urdhër të Edi Ramës, për të mos bërë transparencë, për të mbuluar korrupsionin, për të mos dalë të emri i Ramës, Beqajt, Manastirliut, kanë vendosure që të bllokojnë kërkesat për informacion. Refuzojnë që të pranojnë të kalojnë për miratim kërkesat.
Kemi vepruar ashtu si PS, siç ligjin parashikon që ekspertët të takohen dhe të dakordësohen për kërkesat për informacion. Janë dakordësuar për pjesën më të madhe të shkresave, vetëm për tre shkresa ekspertët e PS kishin disa kërkesa të vogla. Dua të identifikoj faktin që ekspertët e PS kanë qenë bashkëpunues, por dje e bllokuan në Komisionin Parlamentar.
Për shkresat dërguar spitaleve publike refuzonin të kërkoheshin të dhëna mbi emrat e personave që kanë kryer Check Up-in, ndërkohë që e dimë që këtu janë bërë shkeljet më të mëdha me persona që nuk jetojnë më apo që e kanë bërë dy herë brenda vitit. Nënkryetari dhe sekretari gënjyen publikisht duke thënë që kërkesat nuk i kanë marrë, kur më 5 prill iu kam dërguar.
Një tjetër çështje që dua të them është se nuk duan të bëjnë transparencë. Dje ata votuan kundër që të kalonin shkresat për informacion. Edhe planin hetimor që vetë e dorëzuan refuzuan që ta lexonin. Ai është plani i tyre. Refuzuan sepse ai nuk është plan për të hetuar, por për të bllokuar komisionin hetimor. Plarent Ndreca ka fyer, ka intimiduar ekspertët nëse ata do merrnin fjalën do ndesheshin me padi për shpërdorim të detyrës.
