Ndeshja mes Teutës dhe Vllaznisë, e luajtur në “Niko Dovana” për javën e 32-të të Kategorisë Superiore, nuk ka prodhuar as fitues dhe as gola.
Sfida u mbyll në barazim 0-0, por pavarësisht rasteve të pakta, nuk munguan polemikat nga të dyja ekipet. Shkodranët kishin pretendime për dy penallti, në minutën e 13-të, për prekje me dorë dhe në minutën e 86-të, për një ndërhyrje të portierit Vata ndaj Ajdarevic. Ndërsa durrsakët kishin pretendime për një gol të anuluar.
Ky barazim nuk i bën punë asnjërës prej skuadrave që tashmë ndodhen në një situatë shumë delikate.
Teuta shkon në kuotën e 38 pikëve dhe e shikon veten në zonën “play-out”, prapa Laçit ndërsa kuqebluve i bën presion Partizani që pas fitores me Dinamon ndodhet në vendin e tretë vetëm një pikë larg tyre.
Kjo ishte ndeshja e pestë rresht në kampionat për Vllazninë pa fitore. Gjithashtu, ajo në mesjavë ka ndeshje në Kupë ndaj Egnatias ku duhet të përmbys rezultatin 1-0 të ndeshjes së parë.
