Drejtuesi politik për Partinë Demokratike në Tiranë, Belind Këlliçi ka folur sërish pasditen e sotme mbi aferën “5D” dhe 30 mln eurot e vjedhura nga kjo kompani.
Në një takim me demokratët në Belsh ,Këlliçi tha se nuk e di se çfarë duhet të ndodhë më shumë në një vend normal, kur kapet një kryetar bashkie, si Erion Veliaj, duke vjedhur, kur kapen drejtorët e tij duke vjedhur 100% të tenderave, teksa shtoi se Me 30 mln eurot e vjedhura nga “5D” mund të strehoheshin 2 mijë familje që janë pas shtëpi.
“Erion Veliaj ka vjedhur 130 mln euro nga një incinerator që nuk ekziston. E patë Veliajt se si i trajtoi vjedhjen e 30 mln eurove me ‘5D’? i krahasoi me ato pjatat me patate, sikur bien ato patatet në tokë, duke thënë se këto janë gjëra të vogla, ndërsa janë vjedhur 30 mln euro. Me ato 30 mln euro mund të ishte zgjidhur çështja e strehimit për 2 mijë familje”, tha Këlliçi.
Ai gjithashtu komentoi edhe reagimet e miqve tanë ndërkombëtarë, që nuk përmendën korrupsionin e Erion Veliajt.
“Ndër gjithë reagimet, shquaj dhe përshëndes reagimin e ambasadës së SHBA në raport me evidentimin e korrupsionit me emrin e Erion Veliajt, duke e thënë hapur fare sot: që qytetarët kanë të drejtë dhe inkurajohen të protestojnë kundër korrupsionit, dhe ky korrupsion ka një emër, Erion Veliaj.
Dhe kjo nuk na bën ne me turp, por ata që marrin përsipër të mos thonë asnjë fjalë për banditë të kësaj natyre, për hajdutë të kësaj natyre. Kjo bën me turp ata që marrin përsipër të mbrojnë hajdutërinë në këtë vend”, tha Këlliçi.
