Katër futbollistë të Erzenit dhe Partiznait, të kategorisë U-21 janë vënë në hetim nga Policia pas dhunës në stadiumin “Tofik Jashari”.
Superliga shqiptare e futbollit për moshat U-21 zhvilloi dje raundin e 19-të, por sfida mes Erzenit dhe Partizanit degjeneroi në dhunë, grushte, ofendime dhe shkelma.
Policia njofton se ka nisur hetimi për 4 futbollistë, për veprat penale “Plagosja e lehtë me dashje”, “Dëmtime të tjera me dashje”, “Shkatërrimi i pronës” dhe “Prishja e qetësisë publike”.
Në hetim janë vënë futbollistët, Jorgis Hasanas, 20 vjeç, Ralf Çela, 20 vjeç, Joel Serna, 18 vjeç, dhe M. D., 22 vjeç.
Ndërkohë, burime bëjnë me dije se dy futbollistët që përfunduan në spital, pas mjekimit kanë lënë spitalin po ditën e djeshme.
Dueli përfundoi 2-2, teksa Partizani mban vendin e dytë dhe Erzeni në pozitën e tretë.
Njoftimi:
U konfliktuan fizikisht dhe dëmtuan ambientet e dhomave të zhveshjes, pas përfundimit të ndeshjes së futbollit “Erzeni-Partizani”, procedohen penalisht 4 lojtarë të 2 ekipeve të kategorisë U-21.
Në përfundim të veprimeve procedurale të kryera për konfliktin e ndodhur ditën e djeshme, rreth orës 14:00, ndërmjet lojtarëve të ekipeve të kategorisë U-21, “Erzeni” dhe “Partizani”, pas përfundimit të ndeshjes së futbollit ndërmjet tyre, në fushën sportive “Tofik Jashari” (aktivitet për të cilin nuk ishte njoftuar Policia), ju informojmë se:
Shërbimet e Komisariatit të Policisë Shijak kanë referuar materialet në Prokurori, ku ka nisur procedimi në gjendje të lirë, për veprat penale “Plagosja e lehtë me dashje”, “Dëmtime të tjera me dashje”, “Shkatërrimi i pronës” dhe “Prishja e qetësisë publike”, për 4 lojtarë të 2 ekipeve të futbollit, konkretisht shtetasit J. H., 20 vjeç, R. Ç., 20 vjeç, J. S., 18 vjeç dhe M. D., 22 vjeç.
Pas përfundimit të ndeshjes, këta shtetas janë konfliktuar fizikisht me njëri-tjetrin dhe kanë dëmtuar ambientet e dhomave të zhveshjes.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
