Igli Cara, i cili u zgjodh koordinator i “Federatës së Opozitës” për qarkun e Durrësit dha detaje mbi pikat që u ranë dakord mes palëve në takimin e tretë që u zhvillua ditën e premte, në lidhje me kërkesat për reformën për kodin e ri zgjedhor.
Përmes një lidhje “Skype” në MCN Tv, Cara tregoi se “Federata e Opozitës” pati dakordësi për listat e hapura (që tashmë janë dhe një detyrim ligjor”, për rikthimin e koalicioneve parazgjedhore, votimin e Diasporës dhe rritjen e penaliteteve për manipuluesit e votës.
Po ashtu Cara bëri me dije se një tjetër çështje që është në shqyrtim është dhe votimi elektronik, duke sqaruar se ka pasur një kërkesë nga strukturat që të jenë 4-6 zona zgjedhore dhe jo 12.
“Rama dhe ekipi i tij, zgjedhjet i kanë zhvilluar me një sistem që i manipulojnë, edhe pas këtij manipulimi Rama ka 48% të votave. Kjo tregon që Rama nuk është shumicë. Nuk është vetëm faji i Ramës, një pjesë të fajit e kemi ne për shkak të marrëveshjes së 5 qershorit që prishi koalicionet. Nëse do ishte me koalicione Rama do të ishte në minorancë, do të kishte 68-69 deputetë në Parlament. Bashkimi i opozitës, është i nevojshëm pasi në këtë mënyrë realizohet rotacioni. Historikisht si PD si PS kanë qeverisur me koalicione. Ky takim qe i frytshëm, pati një dakordësi për të gjitha vendimmarrjet. U morën vendime për 4 kërkesat kryesore që do të kemi sa i përket kodit zgjedhor. Pati dakordësi ku të gjitha propozimet që do të merren do të delegohen në tryezën e kodit zgjedhor, tek Bylykbashi. Ndryshim kryesor do të jetë ndryshimi i koalicioneve parazgjedhore. Të gjitha partitë aleate të jenë të listuara me emër dhe me logo.
Pika e dyta ishte për votimin e Diasporës, pastaj nëse do të kishim një dakordësi për votimin elektronik. Pati kërkesë që të paktën mos të jenë 12 zona zgjedhore, por 4-6. Kjo është në shqyrtim, dhe rritja e penaliteteve për manipuluesit. Deri tani drejtësia nuk ka vepruar. Këto ishin 4 pika që pati dakordësi dhe do të shtrohen në tryezën e bisedimeve. Numri i partive opozitare do të jetë shumë i madh se do të kemi nevojë që të grupojmë çdo votë të shqiptarëve.
Partitë opozitare janë faktor real që s’mund të anashkalohet. Ka zëra kritikë që thonë pse janë të nevojshme partitë aleate. Në 2013 kanë pasur 130 mijë vota, nëse i referohemi shpesh këto vota nuk janë përkthyer në mandate. Kjo kërkon trajtim të veçantë se kemi nevojë që të jemi të ndershëm se kjo do të na rrisë besimin që në zgjedhjet e ardhshme të jemi bashkë për të arritur qëllimin. Përveç koalicioneve, kuptohet dhe listat e hapura. Është e pranuar nga të gjitha që listat e hapura duhet të jenë të patjetër edhe për shkak të anës ligjore. Kjo do të sjellë ndryshim të madh edhe në atmosferën politike.” – tha Igli Cara.
