Katër punonjës të Bashkisë Korçë u pezulluan nga detyra dhe ndaj tyre u caktua masa e sigurimit personal “Detyrim për t’u paraqitur në policinë gjyqësore” nga gjykata, me kërkesë të prokurorisë së rrethit.
Dyshohet se ata kanë favorizuar 20 subjekte. Sipas hetimeve, fillesa e abuzimit për 4 personat e marrë nën hetim për shpërdorim detyre, e ka që në dhënien e lejës së ndërtimit për këto objekte.
Megjithëse këto ndërtime kanë pasur destinacion ekonomik për qëllime biznesi, kryesisht hotelerie kanë paguar taksa për infrastrukturën si ishin ndërtime për qëllime banimi.
Sipas ekspertëve të krimit ekonomiko financiar, diferenca e taksave mes këtyre të dyjave është shumë e madhe. Për banim kjo taksë ështe 3 perqind e vleres se investimit, kurse per qellime biznesi taksa eshte 8 perqind. Pra diferenca është 5 përqind e vlerës se investimit.
Indicien për të nisur një hetim të tillë rreth një vit e gjysmë më parë, zyra e krimit ekonomiko financiar në Drejtorinë e Policisë së Korçës, e ka marrë nga denoncimi i disa bizneseve, të cilët edhe pse kryejnë të njëjtin aktivitet, në të njëjtën zonë, pagesa e taksave dhe tarifave është e ndryshme.
Nga hetimet fillestare, u mësua se pikërisht ndyshimi ishte tek cilësimet që kishte bërë bashkia e Korçës për këto biznese.
Burime të Prokurorisë së Korçës thonë se pas pajisjes me lejë nga gjykata, kanë filluar dhe përgjimet e 4 drejtorëve dhe përgjegjësit të financës. Në fashikujt e përgjimit dolën dhe raste të tjera, të njëjta me denoncimin e parë, për ndërtesa të tjera në të tjera zona. Megjithëse tarifa ndryshon në bazë të vendndodhjes apo sipërfaqes së ndërtimit, skema e abuzimit mbetet e njëjtë, që deri në këtë fazë hetimi, shpërdorimi kap shumën e 30 milion lekëve.
Prokuroria e Korçës ka marrë nën hetim 4 drejtorët në Bashkinë e Korçës për veprën penale të shpërdorimit të detyrës dhe gjykata vendosi masën e sigurimit personal atë të detyrimit të paraqitjes për:
1.Zhaneta Lubonja/ Drejtore e Urbanistikës;
2. Ermal Gjermani/ përgjegjës i zyrës së planifikimit dhe kontrollit të territorit në bashki;
3. Olvis Petro/ Specialist buxheti dhe
4. Soniel Prifti/ Drejtor i Drejtorisë së Taksave dhe tarifave vendore.
Hetimet vijojnë për të zbuluar nëse ka persona të tjerë të implikuar.
