Ish-kandidati për kryetar bashkie në Tiranë në zgjedhjet e majit 2023, Belind Këlliçi, akuzoi që një vit më parë abuzimet e kompanisë “5D” dhe implikimin e drejtorëve dhe bashkëpunëtorëve të ngushtë të Erion Veliajt, i cili më pas i cilësoi shpifje.
Këlliçi deklaroi në emisionin “Të Paekspozuarit”, në MCN TV se këto informacione ishin dhënë prej vetë shtabit të këtyre drejtorëve, apo vetë këtyre të fundit, siç ishte rasti i Mariglen Qatos, sepse ata joshnin pjesëtarët e shtabit elektoral të kandidatit të opozitës për të punuar në investimet e “5D”.
“E di nga e kam marrë vesh unë për kompaninë “5D”? Nga shtabi elektoral i Erion veliajt. Filloi fushata dhe u ndezën motorrët në janar 2023. Në çdo njësi të Tiranë ka patur nga një drejtor në shtabin elektoral, unë kam patur stafin tim, njerëz opozitar dhe pjesa dërrmuese pa punë. Këta, mirë që shkonin me arrogancën e të fortit me pushtetin, patronazhistët, e milionat e eurove, këta rrihnin gjoksin. Ky Mariglen Qato thoshte: Këtë pallatin e kam unë, këtë po e bëj unë, kemi hotelin në Durrës. Keni çuna të forumit tua marr tua fus në punë në Dhërmi? Keni çuna tua fus në punë në Durrës? I kemi marrë vesh nga këta.
Në fillim na dukej e pabesueshme. Por në qarqet mediatike dhe të biznesit kjo dihej prej kohësh. Në fillim u habitën me mua: Si ka mundësi që ti nuk e di!
Dhe kur kam mbledhur informacionin për një muaj e gjysmë, ka qenë e thjeshtë. Futu në QKB dhe i gjen të gjitha lidhjet aty. Futu te organiograma e bashkisë dhe e gjen kush janë”-tha Këlliçi.
Kujtojmë që ditën e sotme shoqëria civile së bashku me opozitë protestuan përballë Bashkisë së Tiranës ku kërkuan dorëheqjen e kryebashkiakut Erion Veliaj pas aferës “5D”, ku disa prej drejtorëve të kësaj Bashkie kishin përfituar miliona euro tendera nga kjo bashki apo institucione vartëse të saj me kompaninë e tyre “5D Konstruksion”, që sipas SPAK, pronarët “de facto” të saj ishin Mariglen Qato dhe Redi Molla.
