Pak javë pas sulmit në Banjskë në shtator të vitit të kaluar, policia nisi procedurat për ndërtimin e një stacioni policor në Zubin Potok.
Mirëpo disa muaj më vonë, tenderi për ndërtimin e këtij stacioni është anuluar dy herë. Zyrtarisht janë dhënë arsye të tjera por besohet të ketë lidhje me procesin e anëtarësimit të Kosovës në Këshillin e Evropës. Serbët dolën në protestë, ndërsa ndërkombëtarët u shprehen të shqetësuar për shpronësimet. I fundit që e përmendi ishte edhe i dërguari amerikan Gabriel Escobar që qëndroi për vizitë në Kosovë.
“Në fakt për ne është shumë më rëndësi që të kemi stacione, nënstacione, zyre të ndryshme ku janë policë aty me të vetmin qëllim që të ofrojmë shërbime ndaj qytetarëve për shembull ne kemi aktivitete të ndryshme policore që kanë të bëjnë me komunitetin e që nuk mund të realizohen po të mos jemi afër apo tek komuniteti”, tha Veton Elshani, zv/drejtori policisë në veri.
Herën e parë tenderi u anulua më 29 shkurt për siç u tha disa lëshime në procedura të prokurimit, ndërsa më 21 mars u anulua me arsyen se vlera e punimeve të ofertuara nga kompanitë ishte shumë e lartë. Policët në Zubin Potok aktualisht qëndrojnë në kontejnerë pa hapësira të mjaftueshme. Pavarësisht kësaj, policia thotë se nuk ndikon në ruajtjen e rendit dhe të qetësisë.
“Ndoshta ajo varet a do të ketë nevojë apo jo për arsye se ne e kontrollojmë të gjithë veriun e vendit, por përsëri aspekti policor nuk ka të bëjë me atë ushtarak, aspekti policor ka të bëjë me ofrim të shërbimeve ndaj komuniteti dhe ne duhet të jemi afër tyre, kështu që ne kurdo që ne kemi zyra tona do t’i shrytëzojmë”, tha Elshani.
Për ekspertët e sigurisë policia duhet të ketë stacionet e saj, sidomos në veri. “Qëndrueshmëria operacionale garantohet vetëm atëherë kur ka edhe logjistikën përcjellëse, mendoj që në këtë aspekt dhe në këtë format nuk duhet asesi të tërhiqemi sa i përket vazhdimit të punimeve në pikat kyçe neurologjike të pjesës veriore dhe kështu këto baza do të duhen të jenë të përhershme dhe strukturat tona të sigurisë”, u shpreh Drizan Shala, eksperti sigurisë.
Policia e Kosovës ka sqaruar se për ndërtimin e stacionit ishin ndjekur të gjitha procedurat ligjore dhe kishin nisur që në vitin 2018.
