GJKKO ka rrëzuar kërkesat për revokim të masave të sigurisë për liderin demokrat Sali Berisha dhe dhëndrin e tij, Jamarbër Malltezin.
Sali Berisha dhe Jamarbër Malltezi iu drejtuan sërish sot Gjykatës së Posaçme për zëvendësimin e masës “arrest shtëpie” me masë me të lehtë siç është ajo e detyrimit për tu paraqitur, por gjyqtarja Irena Gjoka vendosi mospranimin e kërkesave të tyre.
Në kërkesën e drejtuar gjykatës, avokatët e Berishës dhe Malltezit, argumentonin se në këtë fazë që ndodhet hetimi janë zbutur nevojat për mbajtjen e tyre në masën “arrest shtëpie” dhe për këtë arsye kërkonin vendosjen e një mase me të lehtë.
Kujtojmë se kryedemokrati Sali Berisha ka bërë disa herë kërkesë për ndryshim të masës së sigurisë, por ajo është refuzuar. Po ashtu ai ka kërkuar që të jetë i pranishëm në seancat plenare, si e drejtë e tij për të përfaqësuar interesin e qytetarëve që e kanë zgjedhur, në Kuvend. Pavarësisht pretendimeve të tij, GJKKO ka refuzuar kërkesat.
