Ish-gjyqtari Gjin Gjoni është zgjedhur kreu i degës së Partisë Demokratike në Lezhë, në zgjedhjet që u mbajtën këtë të shtunë.
Numërimi i votave ka përfunduar pak minuta më parë, teksa Gjin Gjoni ka fituar me rezultat të thellë votash përballë dy kandidatëve të tjerë.
Sipas Komisionit të Zgjedhjeve, gjithsej kanë votuar 1053 demokratë. Pas numërimit, 604 vota kanë rezultuar për Gjin Gjonin, 312 vota për kandidatin tjetër Albert Rusti dhe Paulin Marku ka arritur të marrë 131 vota. Në kutinë e votimit kanë rezultuar 6 vota të pavlefshme.
Pas fitores, në një prononcim për media, Gjoni falënderoi kolegët për garën dinjitoze dhe qytetarët e Lezhës që e votëbesuan. Ai u shpreh se do të fillojnë me riorganizimin e PD-së së Leshës dhe përgatitjen për fushatën elektorale për zgjedhjet e vitit të ardhshëm.
“Në radhë të parë doja të falënderoja dy kolegët e mi për garën dinjitoze. Populli i Lezhës arriti të më votëbesojë mua, është përgjegjësi shumë e madhe. Patjetër që situata politike në të cilën ndodhemi është jashtëzakonisht shumë kritike, por Partia Demokratike Lezhës ka objektiva të qartë. Të bashkuar siç jemi sot do të fillojmë me riorganizimin e partisë dhe përgatitjen për fushatën elektorale të 2025”, tha Gjin Gjoni pasi u zgjodh fitues.
