Detaje të reja janë zbuluar nga plagosja e 3 ditëve më parë në Velipojë. Policia ka mundur që të identifikojë autorin e ngjarjes, 25-vjeçarin me inicialet K.L,. Autori 25-vjeçar kishte thyer masën e sigurisë “arrest shtëpie” në momentin që ndërmori aktin.
Ngjarja ndodhi në datën 2 prill në aksin Shkodër-Velipojë, rreth orës 21:45 në vendin e quajtur ura e Gjo Lulit në zonën e Mali Kolaj. I plagosur mbeti shtetasi Emiljano Paloka, 27 vjeç.
Sipas burimeve 27-vjeçari ndodhej brenda automjetit bashkë me dy shokë të tij dhe plagosja ka ndodhur brenda në makinë ku është gjetur edhe gëzhoja e armës së zjarrit. Nga hetimet e para dyshohet se plagosja e shtetasit Emiljano Paloka ka ndodhur padashje nga një prej shokëve të tij në një shkrepje të pavetëdijshme të armës në lojë e sipër brenda automjetit.
“Si rezultat i veprimeve hetimore të kryera nga specialistët e Seksionit për Hetimin e Krimeve ndaj Personit të DVP Shkodër, për zbardhjen e rrethanave të plagosjes së ndodhur mbrëmjen e datës 02.04.2024, në fshatin Malikolaj, Velipojë, bazuar dhe në informacionet e siguruara nga inteligjenca policore, është identifikuar autori i dyshuar i këtij rasti, shtetasi K. L., 25 vjeç, banues në fshatin Baks i Ri, Velipojë.
Nga verifikimet e kryera ka rezultuar se shtetasi K. L. kishte thyer masën e sigurisë “Arrest në shtëpi”, të caktuar nga Gjykata, për veprën penale “Vjedhja e kryer duke shpërdoruar detyrën”.
Vijon puna për lokalizimin dhe kapjen e këtij shtetasi.
I plagosuri, shtetasi E. P., 27 vjeç, vijon të jetë në kujdesin e mjekëve.
Në drejtimin e Prokurorisë vijon puna hetimore për zbardhjen e rrethanave të këtij rasti.”- njofton policia.
Materialet procedurale do t’i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
