Gjykata e Lartë ka rrëzuar rekursin e deputetes së Partisë së Lirisë, Monika Kryemadhit, e cila kërkonte kthimin e telefonit të sekuestruar nga SPAK.
Kryemadhi kishte ankimuar vendimin e 4 janarit të Gjykatës së Apelit të Posaçëm, por rekursi nuk u pranua nga Gjykata e Lartë. Më herët sekuestrimi i telefonit të Kryemadjhit është lënë në fuqi edhe nga GJKKO.
Telefoni i Kryemadhit është vendosur nën sekuestro, pasi SPAK ka nisur hetime pas disa kallëzimeve ndaj saj dhe personave të lidhur me të, përfshirë kreun e Partisë së Lirisë, Ilir Meta. Telefoni është gjetur në banesën e nënës së Monika Kryemadhit.
Ish-kryetarja e LSI-së është në hetim nga SPAK prej disa kohësh pas një kallëzimi për shpenzimet e kryera nga Kryemadhi për disa ndërhyrje estetike jashtë vendit, pagesat e të cilave nuk janë deklaruar.
Nga ana tjetër, Kryemadhi, disa muaj më parë është pyetur nga gazetarët se për cilën çështje i është sekuestruar celulari dhe ajo tha se ka të bëjë me inceneratorët.
