Këshilltari i opozitës në Bashkinë e Tiranës, Ilir Alimehmeti, e konsideroi një skandal të përmasave të mëdha dosjen ‘5D’.
I ftuar në SYRI TV, Alimehmeti tha se kjo është arsyeja që u kërkua një mbledhje urgjente e këshillit bashkiak. Skandalin me dosjen ‘5D’, Alimehmeti e cilësoi si sipërfaqen e gërvishtur, pasi sa më thellë të shkohet, aq më shumë shtohet zullumi.
“Askush s’mund të fshihet më përballë një situate të tillë, duhet të japin llogari se çfarë ndodh me taksat e qytetarëve, çfarë ndodh me ato miliona euro që qarkullojnë mes drejtorëve. Çfarë është kjo që blindohet bashkia me polici dhe dyert i mbyllin me zinxhirë? Bashkia është e qytetarëve”, tha Alimehmeti.
Ai tha se skandali në bashki nuk është thjesht me korrupsionin dhe vjedhjen e parave të qytetarëve, por këto para janë përdorur për të blerë vota, që të blenë pushtetin, dhe të vjedhin sërisht para.
“Zoti Këlliçi ka mbi 1 vit që e denoncon këtë aferë madhore dhe ja ku doli që kemi të drejtë. Kështu do dali edhe me 14 majin, që kanë përdorur këto para për zgjedhjet. Ndaj duhet një reagim qytetar, pasi nga skandale të tilla dëmtohen të gjithë qytetarët”, tha Alimehmeti.
Ai tha se një tjetër skandal është ai që po ndodh me ‘Eco Tirana’, të cilës do t’i jepen para nga fondet e buxhetit dhe më pas do të jenë qytetarët që do të paguajnë për shërbimet, ndërkohë që i jepet pastrimi i të gjithë qytetit pa asnjë garë apo pa bërë asnjë tender.
Alimehmeti tha se Erion Veliaj është i tmerruar, i frikësuar, mbyll mbledhjesh për 313 sekonda sepse ka frikë të përballet me pyetjet dhe diskutimet.
