Një protestë e pazakontë është zhvilluar në Gjermani nga Sindikata e Policisë Gjermane (DPolG) lidhur me mungesën e uniformave në policinë bavareze.
Dy efektivë të policisë së patrullës, një burrë dhe një grua kanë dalë nga makina pa pantallona edhe pse në krye të detyrës. Në videon e publikuar nga sindikata, policët pyesin njëri-tjetrin se “Sa kohë ke pritur për uniformën?” dhe njëri thotë 4 muaj dhe tjetri 6 muaj.
Përfaqësues të sindikatës thonë se që nga viti 2020, askush nuk ka folur për mangësinë në cilësinë e uniformave, por për mungesë të disponueshmërisë së uniformave. Aktualisht, 21 artikuj uniforme si pantallona, xhaketa dhe kapele mund të dorëzohen vetëm me kohë pritjeje prej disa muajsh. Veshjet zëvendësuese, pajisjet fillestare për punonjësit e rinj ose kur ndërrohen nga policia kriminale në polici rrugore nuk janë të disponueshme menjëherë dhe në kohën e duhur.
Sindikata i bëri thirrje Ministrisë së Brendshme bavareze që të sigurojë shpejt një zgjidhje edhe nëse kjo do të përfshinte kosto shtesë.
Ministria e Brendshme bavareze justifikon problemin me zinxhirët e ndërprerë të furnizimit për shkak të luftës në Ukrainë, por policët thonë se vështirësitë kanë ekzistuar që nga shpërthimi i pandemisë së Covid-19.