Pas mesfushorit Piotr Zielinski dhe sulmuesit Mehdi Taremi, Inter është gati për një tjetër goditje me parametra zero për verën e ardhshme, këtë herë në repartin e mbrojtjes.
Mbrojtësi 28-vjeçar i Atleticos së Madridit, Mario Hermoso është emri i shënuar prej kohësh në listën e Marottës dhe Ausilios, teksa media pranë klubit zikaltër bën me dije se edhe trajneri Inzaghi ka dhënë miratimin për firmën me spanjollin.
Hermoso ka kontratë deri në fund të sezonit me madrilenët dhe deri tani ka refuzuar çdo ofertë për të rinovuar, teksa nga kjo situatë zikaltrit janë gati të përfitojnë për t’i ofruar një kontratë 5-vjeçare me pagë 5 milionë euro në sezon.
Natyrisht një shifër aspak modeste, por te Interi janë plotësisht të bindur në cilësitë e 28-vjeçarit, që ka treguar se ditë bëjë shumë mirë si mbrojtësin e qendrës në rreshtimin me tre, ashtu edhe atë të krahut të majtë.
Në këtë mënyrë ai do të shndërrohej në një alternativë mjaft të vlefshme edhe për Bastonin në prapavijën zikaltër, teksa te Hermoso vlerësohet shumë edhe eksperienca në nivelin ndërkombëtar.
Mbrojtësi i rritur te Reali i Madridit është aktivizuar në të shkuarën te Valladolid dhe Espanyol, teksa prej 5 sezonesh është shndërruar në titullar te Atletico e Madridit.