Kuvendi i Shqipërisë ka miratuar në seancën e sotme plenare, (4 Prill 2024) amnistinë penale që do t’i japë liri të menjëhershme 700 të dënuarve, sapo ligji të botohet në Fletoren Zyrtare.
Pas 5 muajsh debate, deputetët kanë votuar me 110 vota pro dhe 1 kundër, ligjin nga i cili përfitojnë 1100 të dënuar dhe të paraburgosur, ku krahas 700 të dënuarve, 400 të tjerët do të përfitojnë ulje dënimi nga 1.5 deri në 2 vite burgim.
Agron Shehaj ishte i vetmi deputet që votoi kundër amnistisë, ndërsa deputetja Ermonela Felaj abstenoi.
Amnistia “mollë sherri” mes deputetëve
Aministia penale u depozitua në Kuvend që në muajin Dhjetor të vitit të kaluar, por për shkak të mos arritjes së dakordësisë mes palëve për të mundësuar votat, drafti u shty për 3 muaj me radhë.
Gjatë diskutimeve në Parlament, Enkelejd Alibeaj dhe Lulzim Basha e quajtën draftin si pazar. Basha tha se propozimi që kanë arritur dy palët synon të ulë dënimin e zyrtarëve të dënuar për korrupsion, deri në zerim të dënimit, si dhe lë në qeli protestuesit e Partisë Demokratike që akuzohen për “Kundërshtim të Policisë”, në bashkëpunim.
“Një amnisti që shpërblen zyrtarë të korruptuar dhe dënuar nga GJKKO dhe ndëshkon opozitarë dhe protestues të tjerë. Është Pazar anti-SPAK, anti-drejtësi, përfitojnë të korruptuarit, përfshirë zyrtarë të lartë siç është ish-sekretarja e përgjithshme e Shëndetësisë”, tha Basha.
Akuzat i hodhi poshtë Bardhi dhe ministri i drejtësisë, Ulsi Manja duke thënë se asnjë zyrtar i dënuar nga GJKKO nuk përfiton.
“Asnjë i dënuar nga GJKKO nuk do të përfitojë. Madje janë depozituar dhe kërkesat e opozitës, për protestuesit, ata që kanë proceduar në këtë vend, që ndiqen penalisht nga drejtësia”, tha ministri Manja.
“Asnjë politikan nuk përfiton, asnjë zyrtar i lartë i korruptuar”, tha Bardhi.
Kush përfiton nga amnistia penale
Përmes kësaj amnistie, përfitojnë falja totale të dënimit burrat e dënuar me 4 vjet ose më pak vite burg, për dënime të dhëna dhe që kanë marrë formë përfundimtare deri më 31 mars 2023, ndërsa gratë përfituese do jenë ato që kanë deri në 5 vite dënim. Masa e dënimit është rritur pas propozimeve të mëvonshme, pasi varianti fillestar parashikonte falje 3 vite për burrat dhe 4 vite për gratë. Sipas kritereve të përcaktuara në draft përjashtohen nga vuajtja e dënimit edhe burrat kur në datën e hyrjes në fuqi të amnistisë, u ka mbetur pa kryer deri në 4 vjet burg, ndërsa grave kur u ka mbetur 5 vjet. Përfshirë gjobën apo dënimet alternative.
Përfitues nga amnistia janë gratë mbi moshën 50 vjeç ose mbi këtë moshë, ndërsa për burrat efekti do të jetë kur janë mbi 65 vjeç. Nga amnistia do të përfitojnë edhe të miturit apo ata që kanë qenë 18 vjeç në kohën që kanë kryer veprën penale, ose nën këtë moshë
Kush përjashtohet nga amnistia?
Nuk përfitojnë falje të dënimit përqindja më e madhe e veprave penale, që përfshin ato më të rëndat që nisin që nga krime kundër njerëzimit, krime kundër jetës, krime kundër autoritetit të shtetit ku përfshihet edhe korrupsioni, terrorizmi dhe shumë e shumë kategori veprash penale, mbi 240 të tilla. Nuk përfitojnë amnisti, as falje e ulje të dënimit dhe as përjashtim nga ndjekja penale të atyre që i janë shmangur drejtësisë. Personat që i shmangen drejtësisë, ata që janë arratisur, që kanë dijeni për procesin apo masat ndaj tyre apo vendimet e formës së prerë, dhe i shmangen me vullnet të lirë.
-Kuvendi gjithashtu miratoi edhe amendamentin e parë të propozuar nga Gazment Bardhi, për ndryshimin e datës për përfitimin e amnistisë deri më 31 mars, me 113 vota pro, 1 kundër dhe asnjë abstenim.
Ndërkohë projektligjet e tjera u miratuan me vota si më poshtë:
-Projektligji për koncesionet dhe partneritetin publik privat: 70 vota pro, 44 kundër, 6 abstenim
-Projektligji për disa shtesa dhe ndryshime në ligjin për arkivat: 71 vota pro, 41 kundër, 3 abstenim
-Projektligji për burimet ujore: 71 pro, 41 kundër, 5 abstenim
-Projektligji për turizmin i ndryshuar: 71 vota pro, 47 kundër, asnjë abstenim
-Projektligji për mbrojtjen e konkurrencës: 3 pro, 112 kundër, 2 abstenim
