Ish-kryeministri Sali Berisha, ka kujtuar sërish mbrëmjen e sotme protestën e lajmëruar nga Aleanca për Teatrin para bashkisë së Tiranës ditën e premte, lidhur me aferën “5D”.
Gjatë fjalës së tij në tubimin qytetar Berisha u shpreh se nga e premtja nis beteja gjer në përmbysjen e regjimit të narkoshtetit të Edi Ramës.
Ai i ka bërë thirrje kryebashkiakut Veliaj të japë dorëheqjen: “Erion Veliaj, jep dorëheqjen gjer të premten. Jep dorëheqjen”.
Pjesë nga fjala e Berishës:
“Të dashur qytetarë dhe qytetare, qëndrestarë dhe qëndrestare, misionarë të dinjitetit, shpresës dhe të ardhmes së Shqipërisë.
Sonte takohemi në prag të një ngjarje të madhe, të fillimit të betejës gjer në përmbysjen e regjimit të narkoshtetit të Edi Ramës.
Ditën e premte në ora 11:00, çdo opozitare dhe opozitar e ftoj t’i përgjigjet thirrjes së Aleancës për Teatrin, aleancës më të pamposhtur që ka njohur vendi dhe ndoshta Europa, në betejë fitimtare.
Fitorja e opozitës, fitorja e qytetarëve të Tiranës fillon të premten në orën 11:00 tek Bashkia e Tiranës.
Ndaj le të nisim ne betejën e fitores.
Erion Veliaj, jep dorëheqjen gjer të premten. Jep dorëheqjen!
Populli i Tiranës, në këmbë për dinjitetin tënd, në këmbë kundër poshtëruesit dhe hajdutit, që ka shënuar rekordin më të paparë të historisë së shtetit shqiptar dhe ndonjë shteti tjetër.
Erion Veliaj jep dorëheqjen urgjentisht, mos prit qytetarët të premten në zyrë.
Hapja zyrat qytetarëve. Bashkia është shtëpia e qytetarëve dhe jo e hajdutëve”.
