Shqiptarët vijojnë të jenë në terr informativ sa i takon investimit të Jared Kushner në Sazan. Edhe pse u shit me pompozitet të madh se dhëndri i Trump do të investojë mbi 1 miliardë dollarë, në fakt nuk dihet ende se çfarë do fitojnë shqiptarët, si do të jetë në detaje projekti, a do të ruhet zona etj.
Por, ndryshe nga sa ndodh në Shqipëri, në Serbi është e kundërta. Mediat e huaja në të njëjtën ditë informuan se dhëndri i Trump do të investojë në Sazan dhe në Beograd. Ai do të ndërtojë në kryeqytetin serb dy kulla madhështore. Por, nëse shohim mediat serbe, atje janë të qarta gjërat dhe madje dihet dhe fitimi.
Sipas mediave vendase, ndërtimi do të bëhet te godina e Shtabit të Përgjithshëm të Ushtrisë, që u bombardua nga amerikanët. Toka do i jepet dhëndrit të Trump për 99 vite dhe pas kësaj periudhe ai ka të drejtë të fitojë pronësinë. Po ashtu, projekti do të kushtojë 500 mln dollarë dhe 22 për qind të fitimeve do jenë të shtetit serb.
Sipas pretendimeve të të dyja palëve, marrëveshja e Investimeve për “rivitalizimin” e Shtabit të Përgjithshëm nuk është nënshkruar, por nga dokumenti i publikuar nga mediat serbe, shihet se ka një Memorandum Mirëkuptimi ndërmjet Qeverisë së Serbisë dhe firmave amerikane Atlantic. “Incubation Partners LLC” dhe “Kushner Realty LLC”. Serbia dhe “Atlantic Incubation Partners LLC”, një degë e “Kushner Realty LLC”, pritet të krijojnë një kompani me përgjegjësi të kufizuar me seli në Serbi.
Dy kulla të mëdha që do të përmbajnë hotele dhe apartamente luksoze mund të dalin nga rrënojat e ish-kryeveprës së brutalizmit jugosllav, e ndërtuar në vitin 1963 nga arkitekti Nikola Dobrović. Kompleksi do të duhet të ketë edhe një memorial si dhe një muze.
Pra në Serbi deri diku janë të qarta gjërat, në Shqipëri askush nuk flet. Kryeministri del nëpër media dhe nuk thotë asgjë. Nuk thotë më kryesoren, çfarë do të fitojnë shqiptarët? Në Serbi mirë a keq dihet që serbët do të përfitojnë 22 për qind të investimit, në Shqipëri i vetmi që fiton është Edi Rama, i cili do të përdorë investimin për të “blerë” Trump nëse merr Presidencën. Shqiptarët deri tani kanë fituar “Noc Rrokun”.
/Pamfleti
