Nga Boldnews.al
Kur ka kaluar një vit nga goditja me armë ndaj televizionit “Top Channel”, Policia dhe Prokuroria e Tiranës ende nuk kanë arritur zyrtarisht tek autori dhe motivet e krimit, ku mbeti i vrarë, fatkeqësisht, roja i sigurisë, Pal Kola.
Në 27 mars të vitit 2023, persona të paidentifikuar lëshuan një breshëri kallashnikovi ndaj godinës së Top Channel-it, në zonën e Kasharit, në Tiranë.
Plumbat goditën tragjikisht 60-vjeçarin Pal Kola, punonjës i një kompanie private e kontraktuar për të ruajtur perimetrin e jashtëm të televizionit, si edhe thyen disa xhama të ndërtesës.
Në një reagim të asaj kohe, televizoni më i madh privat në vend e konsideroi sulmin si një “akt terrorist për të dëmtuar e goditur misionin e medias së lirë dhe fuqisë së fjalës së lirë”.
Ngjarja angazhoi strukturat më të larta shtetërore të sigurisë në vend, të cilët garantuan qytetarët se do të zbardhnin sa më shpejt autorët e këtij atentati.
Megjithatë, një vit pas krimit, burime zyrtare nga Policia e Shtetit deklarojnë se ende po punojnë.
Të njëjtin qëndrim mban edhe Prokuroria e Tiranës, e cila deklaron zyrtarisht për “Boldnews.al” se akoma nuk kanë regjistruar emër autori për atentatin.
“Çështja vijon ende në fazën e hetimeve paraprake, pa emër autori. Për shkak të sekretit hetimor, nuk mund të jepet informacion më i detajuar në këtë fazë të hetimeve”, thotë Prokuroria e Tiranës.
Gjithësesi, Policia e Shtetit, në rrugë operative, duket se ka siguruar të dhëna mbi autorin e dyshuar dhe motivet e ngjarjes së 27 Marsit 2023.
Sinjalet e para i dha gazetari investigativ, Artan Hoxha.
Ai deklaroi në emisionin “Të Paekspozuarit” të Ylli Rakipit në 22 shtator 2023 se “Është kapur një person që dyshohet për sulmin ndaj Top Channel. Është kapur në 7 gusht, ka qenë në jug për të kryer atentat. Është i dyshuar si autor, në sulmin që i është bërë medias kombëtare Top Channel. Kishte mesazh për botën e medias. U godit një media e madhe dhe kaloi në heshtje. U kap i armatosur, për të kryer atentat. Pra është person i dyshuar si vrasës me pagesë”.
Disa muaj më vonë, gazetari Hoxha u tregua më konkret për këtë ngjarje, po në emision e Ylli Rakipit në “MCN-TV”.
“…Personi kishte ardhur nga Shkodra, një vrasës me pagesë, i identifikuar si Amarildo Xhanej, me pistoletë me silenciator dhe një veshje tjetër, me doreza. Sapo hyri në një pastiçeri, afër lokalit ku rrinte njeriu që do të vritej, vajti policia. Ky person ishte përfshirë në një seri ngjarjesh, që ka filluar tani të bashkëpunojë me SPAK dhe ka dhënë materiale edhe për çështje të tjera. Përfshirë edhe ngjarjen që ndodhi në Top Channel dhe u vra roja”.
Burime konfidenciale nga Policia e Shtetit deklaruan për “Boldnews.al” se uniformat blu kanë arritur të krijojnë një profil për personin e akuzuar si atentator, porositësit dhe motivin e ngjarjes.
Megjithatë, të njëjtat burime u treguan shumë të ngurtë për të dhënë detaje të mëtejshme, pasi çështja është shumë sensitive dhe vijon të jetë nën hetim.
“Top Channel” e risolli në vëmendje ngjarjen tragjike, saktësisht një vit më pas, në mbrëmjen e 26 marsit 2024. Për të kujtuar atentatin, televizioni zgjodhi të përcillte mesazhin e tij në emisionin më të ndjekur, “Big Brother”.
Moderatori i emisionit, Ledion Liço, i cili është njëkohësisht edhe bashkëshort i njërës prej pronareve të “Top Channel”, Sara Hoxha, në fjalën e tij në hapjen e emisionit, përkujtoi të ndjerin Pal Kola, duke ritheksuar se atentati ndaj Top Channel ishte “sulm krejt i pakuptimtë” dhe “goditje ndaj fjalës së lirë”.
