Ekspertja e OKB-së, e cila arriti në përfundimin se Izraeli po kryente akte gjenocidi në Rripin e Gazës, mori mbështetje të gjerë në Kombet e Bashkuara të martën, me vendet që folën për ta mbështetur atë dhe raportin e saj.
Francesca Albanese, raportuesja speciale për të drejtat e njeriut në territoret palestineze, i tha Këshillit të OKB-së për të Drejtat e Njeriut se vendet duhet të vendosin një embargo armësh dhe sanksione ndaj Izraelit. Duke e zgjeruar personalisht raportin e saj të publikuar të hënën, Albanese tha se Izraeli po e karakterizonte të gjithë popullsinë e Gazës si “të synuar, të vritshëm dhe të shkatërrueshëm” dhe kishte nxjerrë në pah “qëllimin e tij gjenocidal” për “të çlirojë Palestinën nga palestinezët”. Dhjetra diplomatë, kryesisht që përfaqësonin vendet arabe dhe myslimane, por edhe Amerikën Latine, morën fjalën për të mbrojtur mandatin dhe punën e saj.
Pakistani, duke folur për Organizatën e Bashkëpunimit Islamik, mbështeti thirrjen e saj për sanksione dhe një embargo armësh.
“Ne e përgëzojmë guximin tuaj në dokumentimin e akteve që përbëjnë gjenocid në Gaza,” tha përfaqësuesi i Islamabadit.
“Përpjekja e rrezikshme dhe e pamëshirshme e forcës pushtuese për një zgjidhje përfundimtare të çështjes palestineze është e qartë për të gjithë, pasi forcat e saj rrethojnë Rafahun si shkaba dhe grabitja e saj e pamëshirshme e tokës vazhdon pandërprerë në Bregun Perëndimor”.
Egjipti, duke folur për vendet e grupit arab, pohoi mbështetjen e tij për mandatin e Albanese dhe tha se ata ishin shumë të shqetësuar për “sulmin e strukturuar dhe sistematik të Izraelit për ta bërë Rripin e Gazës të pabanueshëm”.
Dhe Katari, në emër të Këshillit të Bashkëpunimit të Gjirit, falënderoi Albanese për raportin e saj dhe kërkoi nga komuniteti ndërkombëtar “t’i japë fund gjenocidit të kryer nga makineria e luftës izraelite”.
