Apeli i Gjykatës së Posaçme ka rrëzuar pasditen e kësaj të hëne, kërkesën e ish kryeministrit Sali Berisha, për të marrë pjesë në seancat plenare në Kuvend.
Berisha ndodhet në “arrest shtëpie” prej datës 30 dhjetor të vitit të kaluar pas hetimeve të nisura për privatizimin e ish-kompleksit Partizani.
Vendimi i Apelit të GJKKO-së:
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtarja Iliriana Olldashi, sot më 25.03.2024, ora 09:00, shpalli vendimin mbi çështjen penale nr. 64 akti, datë 12.03.2024 regjistrimi, regjistruar mbi ankimin e personit nën hetim/ankues S.B., me objekt: “Ankim ndaj vendimit nr. 55, datë 08.02.2024 (disponuar mbi kërkesën kundër vendimit të prokurorëve për “Mospranimin e kërkesës me nr. 1001 prot, datë 15.01.2024 (hyrje në prokurori) të personit nën hetim S.B., paraqitur nëpërmjet mbrojtësit të tij, av. Sokol Mëngjesi” dhe lejimin e z. S.B., deputet i Kuvendit të Shqipërisë, që të marrë pjesë në seancat plenare të Kuvendit të Shqipërisë, në përmbushje të detyrimit që buron nga ky funksion, si person i zgjedhur nga sovrani, për të ushtruar të drejtat dhe liritë politike sipas Kushtetutës së Republikës së Shqipërisë) dhe vendimit nr. 87, datë 03.02.2024 (disponuar mbi kërkesën për përjashtim gjyqtari) të Gjykatës së Posaçme të Shkallës së Parë për Korrupsionin dhe Krimin e Organizuar”, dhe vendosi:
Miratimin e nr. 55, datë 08.02.2024 të Gjykatës së Posaçme të Shkallës së Parë për Korrupsionin dhe Krimin e Organizuar.
Sakaq, pas mbylljes së seancës, në një deklaratë për mediat, avokati i ish-kryeministrit, Genc Gjokutaj ka deklaruar se ky vendim i Apelit nuk është i drejtë për aq kohë sa nuk ka akuza dhe as prova. I pyetur nëse Berisha rrezikon mandatin e deputetit, duke mos u paraqitur në Kuvend, Gjokutaj u shpreh se “Ky është skenari i kryeministrit”.
Gjokutaj: Ky vendim i sotëm vendosi rrëzimin e kërkesës sonë. Sot u vërtetua shkelmimi i Kushtetuës edhe nga Apeli. Këta janë sy që nuk shikojnë dhe veshë që nuk dëgjojnë, me regji. Duam që të lirohet Berisha, sepse nuk ka akuzë dhe nuk ka prova. Këta kanë vënë trupat e tyre për ta mbajtur në këmbë sistemin. Kjo gjykatë me vendimin e saj e largoi veten nga ligji dhe Kushtetuta. Nuk pranon SPAK as ekspertizat, asgjë. Kjo është çartje dhe lajthitje.
Kujtojmë se, Berisha akuzohet për korrupsion pasiv kryer në bashkëpunim në çështjen penale për privatizimin e ish-kompleksit sportiv “Partizani”. Me kërkesë të SPAK, për Berishën është caktuar masa “detyrim për paraqitje” dhe “ndalim i daljes jashtë vendit” pas një seance disa ditore, që kreu i PD dhe avokatët e tij e cilësuan “nul”.
Gjatë deklaratave publike, Berisha i ka cilësuar akuzat politike dhe ka argumentuar pse sipas tij SPAK ka shkelur Kushtetutën duke anashkaluar Kuvendin në masën ndaj tij. Po ashtu, Berisha i ka konsideruar akuzat ndaj tij dhe dhëndrit, Jamarbër Malltezi, po ashtu në “arrest shtëpie” si të paqena dhe të dirigjuara nga Edi Rama.
