Rastet e shumta të përndjekjeve ndaj vajzave janë një problem shumë shqetësues i shoqërisë sonë. Problemet janë të shumta, por së fundmi duke shfrytëzuar hapësirat ligjore, po dënohen dhe djem në mënyrë të padrejtë.
Një problem i tillë na vjen nga Fieri, ku një i ri me emrin Fabio Shabanaj, është dënuar me ‘arrest shtëpie’ pas denoncimit të një adoleshenteje nga Patosi. Arsyeja e denoncimit është përndjekja, madje në vendim shkruhet e ka ndjekur me makinë në shtëpi para dy muajsh, ndërsa së fundmi jashtë oborrit të shkollës, madje duke thërritur: ‘Ouuuu, ouuuu’. Por kjo histori ka shumë pikëpyetje.
Familja Shabanaj kontaktoi te Piranjat për të treguar versionin e tyre.
‘Jam i pafajshëm! Nuk e njoh fare vajzën që më ka denoncuar, nuk e kam takuar kurrë dhe nuk e kam përndjekur kurrë.
‘Nuk është e vërtetë që kam thërritur nga makina. Unë shkova atje për të marrë shokun dhe ndalova të marr një kafe’, – thotë Fabio Shabanaj nga ‘arresti i shtëpisë’.
Fjalët e tij i përforcon dhe babai Baki Shabanaj. Ai madje na jep dhe detaje të tjera.
‘Shkova së bashku me familjen te shtëpia e vajzës në Patos dhe e pyeta nëse ishte djali im ai që e kishte përndjekur.
Adoleshentja nuk e njihte djalin tim, sepse i tregova foton e nipit tim të ndjerë dhe më tha se ky është personi që më ka ngacmuar’.
Nisur nga deklarata të tilla, piranja Kamila Xhakaj vendosi të shkonte vetë në Patos dhe të bisedonte me adoleshenten.
‘Po më ka ngacmuar, më ka përndjekur disa here. Nuk ia harroj zërin. Denoncimin mund ta ketë bërë roja sepse atij i tregova se ky po më ngacmonte’.
Kamila vendosi ti tregonte disa foto nga interneti, jo foton e djalit, duke e pyetur nëse arrinte ta dallonte djalin që e kishte ngacmuar dhe i kishte shkaktuar kaq shumë probleme. Në fakt, për çudinë e të gjithëve, vajza deklaroi se djali dhe shoku i tij ishin personat e treguar nga telefoni i gazetares. Për rikujtesë, fotografi të ilustruara nga interneti.
Më pas, vajzës i tregohet dhe fotoja e vërtetë e personit që po vuan dënimin. Adoleshentja e mohon kategorikisht njohjen e Fabianit.
Gazetarja më pas shkoi dhe u ballafaqua me rojen e shkollës, i cili është një element kyç në këtë histori duke qenë personi që njoftoi policinë. Ky i fundit dukej shumë i acaruar dhe në siklet, duke mos ditur të japë përgjigjen.
Kamila më pas kapi dhe Oficerin e Policisë Gjyqësore Patos që ishte marrë me rastin. Punonjësi i shtetit la shumë për të dëshiruar me përgjigjen e tij dhe nuk arriti të jepte asnjë argument për të mbrojtur punën e tij, që në këtë rast i ka shkatërruar jetën një djaloshi 19-vjeçar./ Emisioni “Piranjat”
