Prej kohësh për një luftë klanesh brenda Partisë Socialiste mes Erion Veliajt dhe Belinda Ballukut, që po vjen gjithnjë e më shumë duke u ashpërsuar.
Së fundmi, ish-deputeti socialist Spartak Braho, ka hapur “çantën e zezë” të tij dhe ka sulmuar zv.kryeministren Belinda Balluku.
Në një intervistë për emisionin “Breaking”, Braho, i pyetur për arrestimet dhe procedimet e fundit të SPAK-ut ndaj eksponentëve të PS-së, tha se kryeministri Edi Rama ka gabuar në emërimin e shumë prej tyre. Ai e cilësoi se në bindjen e tij “Balluku nuk është e pastër në punën që bën” dhe se “duhet të përgjigjet për pastërtinë e figurës së saj”.
“Kryeministri ka bërë zgjedhje të gabuara në aktivizimin në qeverinë e tij të personave të veçantë, të cilët me oreksin e madh për të përfituar në rrugë korruptive, janë ngjyer keqazi. Mos të rendisim listën, por një zv.kryeministër iku, tjetra është në prag të procedimit penal.
Ishte një lajm dje që Balluku është në hetim nga SPAK. Kam patur bindjen që kjo Balluku nuk është e pastër në punën e saj, aq më tepër që rrethi i ngushtë i saj, një pjesë janë të burgosur e arrestuar një pjesë do të shkojnë patjetër. Le të shkojë dhe Balluku, ta provojë një herë atë derë sepse duhet të përgjigjet për pastërtinë e figurës së saj. Por ajo që ka më shumë rëndësi është se përgjegjësia e tyre është personale, penale, politike por përgjegjësi ka dhe kryeministri. Kush i vuri këta? Kush i zgjodhi?
Në politikën e emërimeve Rama ka gabuar, ka bërë emërime të nxituara për të zgjidhur ato ide që ai ka në kokën e tij. Në thelb janë stimuluar projektet dhe ka qenë një iniciativë e mirë, por nuk ka kontrolluar ata që ka vënë në zhvillimin e këtyre projekteve. Ata që ka në qeveri sot, shumica janë të përgojuar”, tha Braho.
