Është zbardhur ngjarja e rëndë që u raportua mbrëmjen e së enjtes në Tiranë, ku një agjent antidroge plagosi me armë zjarri një person, i cili ndodhej në një automjet që po transportonte rreth 1 kg kokainë.
Dinamika e ngjarjes
Ngjarja ndodhi në rrugën “Mihal Duri”, pranë Lidhjes së Shkrimtarëve, ku sipas njoftimit të bluve struktura e narkotikëve kanë qenë duke kryer veprime operacionale dhe kanë tentuar të ndalojnë një automjet tip “Volkswagen Tiguan” me ngjyrë të bardhë me targë AB 780 MP, me drejtues shtetasin Eneo Sulejmanaj.
Ky i fundit nuk i është bindur urdhërit për të ndaluar dhe duke ecur indietro me makinë ka goditur 3 agjentë të antidrogës dhe ka dëmtuar makinën e policisë me qëllim arratisjen.
Gjatë tentativës për t’u larguar një nga agjentët e antidrogës ka qëlluar me armë në drejtim të automjetit dhe për pasojë është plagosur shoferi i mjetit, Eneo Sulejmanaj, i cili mësohet se është edhe kreu i Shoqatës së Transportit Ndërqytetas.
“Gjatë momentit që stuktura operacionale ka tentuar të ndalojë automjetin tip “Volkswagen Tiguan” me ngjyrë të bardhë me targë AB 780 MP, drejtuesi i automjetit nuk i është bindur urdhrave të policisë për të ndaluar dhe ka ecur mbrapsht duke rrezikuar jetën e punonjësve të policisë dhe duke përplasur me qëllim shmangien automjetin e sherbimit të policisë”,- njoftoi Policia.
Gjatë tentativës për t’u larguar një nga punonjësit e policisë ka qëlluar me armë në drejtim të automjetit dhe për pasojë është plagosur drejtuesi i mjetit”,- sqaron më tej Policia.
Sulejmani është dërguar me urgjencë në spitalin e Traumës nga punonjësit e policisë, nga ku u raportua se është plagosur në inde të buta, plumbi nuk i ka prekur asnjë organ jetësor dhe ndodhet jashtë rrezikut për jetën. Sakaq gjatë kontrollit në automjet është konstatuar dhe një pako me peshë rreth 1 kg brenda së cilës dyshohet të jetë lënda narkotike kokainë.
Gjithashtu në automjet me Eneo Sulejmanaj mësohet se kanë qënë duke udhëtuar dhe dy persona të tjerë, të cilët janë shoqëruar në ambientet e DVP Tiranë, ku do të merren në pyetje për veprime të mëtejshme proceduriale.
Bëhet fjalë për shtetasit Shkëlqim Ostreni dhe Igli Begaj, 26 vjeç dhe 20 vjeç, të cilët dyshohen si furnizues kokaine. Raportohet se prej dy muajsh, ata ishin nën vëzhgimin e policisë dhe u kapën në flagrancë, teksa shkëmbenin lëndën narkotike në një rrugë pa krye, ku kishin lënë vendtakimin.
Policia bën me dije se janë njoftuar strukturat e AMP-se të cilat do të kryejnë veprimet hetimore nën drejtimin e Prokurorisë së Juridiksionit të Përgjithshëm Tiranë për sqarimin e plotë të rrethanave të ngjarjes.
Sakaq lidhur me ngjarjen ka reaguar edhe Ministri i Brendshëm, Taulant Balla. Në një postim në rrjete sociale, Balla shkruan se Policia veproi sipas ligjit, iu kundërpërgjigj sulmit.
“Policia e Shtetit ka vepruar sipas ligjit duke iu kundërpërgjigjur sulmit. Si Ministër i Brendshëm duhet të rikujtoj se kushdo që nuk i bindet urdhërit/thirrjes së ligjshme të punonjësit të policisë, ose më rëndë akoma e kundërshton me forcë, guxon ta fyejë, ta agresojë, ta kanosë, ta godasë apo larg qoftë t’i rrezikojë jetën (siç ndodhi sonte) në ushtrim të detyrës apo për shkak të detyrës, duhet ta ketë të qartë që toleranca është ZERO. Policia e Shtetit ka gjithë mbështetjen për të vijuar goditjen e krimit, në gjitha format e tij”,- shprehet Balla.
