Kryetari i grupit parlamentar të PD-së, Gazment Bardhi ka paralajmëruar më herët se do të publikojë dokumenta të dosjes se si sipas tij, u vodhën dhe u manipuluan të dhënat në sistemin TIMS për të favorizuar Olsi Ramën, vëllain e kryeministrit Edi Rama. Sipas tij, në dosjen e plotë të laboratorit të kokainës në Xibrakë, Olsi Rama u konsiderua nga Prokuroria si person i paidentifikuar dhe në momentin kur prokurorët donin të hynin në sistemin TIMS për të marrë të dhëna për përfshirjen e Olsi Ramës, të dhënat në sistemin TIMS u vodhën.
Kryeministri Edi Rama u pyet në lidhje me këto akuza mbrëmjen e sotme në emisionin “Opinion”, ku nuk dha një përgjigje konkrete, por bëri “viktimën”, duke lënë të nënkuptohet se po shpifin për familjen e tij, teksa kaloi edhe në ofendime drejt Bardhit.
“Këtu kur gjendesh përballë një pyetje të tillë, ka dy mënyra. Njëra është ajo që të vjen shqiptarçe, që kur shikon një fytyrë njeriu që është një fytyrë e mirënjohur për opinionin publik dhe opinioni publik është shumë i qartë për integritetin e asaj fytyre t’i kthesh përgjigjen shqiptarçe, që është vëllai i asaj që të ka bërë kokën. Por nuk është përgjigje që mund ta jap unë. Kur të ngacmojnë deri në këtë pikë dhe rikujtojnë që barra më e madhe e kësaj pune është të shikosh familjen tënde të dhunuar në mënyrë të vazhdueshme të shikosh vajzën tënde e cila është në punën e vetë, nuk përzihet kurrë me asnjë punë të shtetit, nuk ka përfituar asnjëherë nga asnjë lloj favori që mund të vijë për shkak të punës time, kur shikon vëllain tënd, djalin tënd, gruan të dhunohen, kjo është barra më e rëndë sepse është familja që paguan kosto. Është shëmbëlltyra kryesore e një shpërfytyrimi politik, moral, në të gjitha aspektet që mishëron ai grup. Në rastin konkret e njëjta fytyrë ka thënë gjëra ekstreme për djalin e atij të cilit tani ka vajtur i është ulur në prehër. Ai do nxjerri atë që s’thuhet.”, tha Rama.
Pas kësaj deklarata, ka ardhur një reagim edhe nga Gazment Bardhi, i cili në një postim në rrjetet sociale i kërkon kreut të qeverisë që të ruajë nervat dhe të mos e mohojë të vëllain. Sipas tij, Rama ka menduar se përmes promovimit të prokurorit të çështjes me votën e tij, do shpëtoje një të dyshuar si trafikant droge nga hetimi penal dhe dënimi, që rastis të jetë vëllai i tij.
“Ruaj nervat Edi! Mos moho vëllain të paktën. Shihemi javës së ardhshme tek Fevziu!
E kuptoj shqetësimin se ke menduar se përmes promovimit të prokurorit të çështjes me votën tënde, do shpëtoje një të dyshuar si trafikant droge nga hetimi penal dhe dënimi, që rastis të jetë yt vëlla! Mbrojta politike dhe pandëshkueshmëria i ka këmbët e shkurtra. Deri atëherë ruaj nervat se do të duhen edhe për vete!” – shkruan Bardhi.
Në vitin 2014, një hetim i Prokurorisë për Krime të Rënda, zbuloi në zonën e Xibrakës, në Elbasan, një laborator modern të përpunimit të kokainës. Fakti që ky laborator nuk ishte “konstatuar” nga Policia krijonte dyshime të forta për përfshirjen në atë aktivitet të paligjshëm të grupeve kriminale që kishin lidhje me qarqe të fuqishme politike.
Në laboratorin e Xibrakës, kokaina sillej e përzier në me lëndë organike që përdorej për regjen e lëkurëve të kafshëve. Ndarjen e bënin specialistët nga Kolumbia, Cezar Avila dhe Walther Moreno. Një nga organizatorët e grupit u konsiderua, Genci Xhixha, i shpallur në kërkim. Në pranga ranë atëherë vëllezërit, Arjan dhe Kelment Dalipi, Gentjan Gjonaj dhe Ermal Hoxha.
Opozita e djathtë ka përmendur publikisht faktin që pas laboratorit të Xibrakës fshihej Olsi Rama, vëllai i kryeministrit Edi Rama.
Zbulimi i laboratorit të Xibrakës shënoi përplasje të fuqishme mes Prokurorisë për Krime të Rënda dhe Ministrisë së Brendshme, të drejtuar në atë kohë nga Saimir Tahiri. Reagimi i fortë dhe aspak bindës i Tahirit në atë kohë forconte dyshimet që laboratori i Xibrakës fshihte lidhjet e forta politike të grupit kriminal që e kishte ndërtuar. Në krye të operacionit “Xibraka” ishte ish-prokurori Eugen Beci.
