Pas 5 muajsh, këtë të hënë po mbahet me prani fizike të deputetëve, Komisioni për Çështjet Ligjore.
Ky hap erdhi pas marrëveshjes së arritur mes opozitës dhe mazhorancës për rikthimin e normalitetit në Kuvend dhe u ra dakord gjithashtu, për ngritjen e dy komisioneve hetimore.
Në këtë mbledhje mungon deputeti i partisë së vulës, Enkelejd Alibeaj.
Deputetët demokratë shprehen se ky rikthim është një shenjë e mirë, megjithëse deputeti Dash Sula, u tregua më i ashpër në fjalimin e tij, duke thënë se nuk duhet shtirur sikur asgjë nuk ka ndodhur.
“Do i bënit shërbim të madh vendit, të kalonit në opozitë. Këtu jemi opozitë, duhet të garantohen të drejtat e opozitës, qytetarët na kanë votuar që të punojmë për ta, jo që të miratohen ligje klienteliste”, tha deputetja demokrate, Dhurata Çupi.
“Pas 5 muajsh për të folur për procedurë është normale, dhe jam më shumë se sa i lumtur. Të bëjmë sikur nuk ka ndodhur asgjë dhe me datën 18 mars të vijmë në Komision dhe të themi që ta fshijmë historinë e këtyre 5 muajve, që kanë ndodhur gjëra shumë të rënda, sa i përket funksionimit të parlamentetit, do mundohem që t’ua bëj të qartë të gjithëve që ky kthim në normalitet duhet të kishte ndodhur që në 5 tetor 2023, gjë që mazhoranca e bëri me dhunë e kokëfortësi dhe kjo marrëveshje që u arrit është një fake i pastër sepse çfarë marrëveshje ka arritur PD-PS, atë që i takon opozitës në Kushtetutë”, tha Sula.
Më herët, për shkak të protestave nga deputetët e opozitës në sallat ku mbaheshin komisionet, mbledhjet zhvilloheshin online.
