Dëshira për t’u hakmarë për vëllanë e vrarë në vitin 2013, ka shtyrë Leonard Luzin alias Zejno për të ekzekutuar Inez Hajrulla dhe mikun e tij të vjetër, Ervis Matodashaj në Vlorë.
Goditja ishte planifikuar të realizohej në muajin Gusht 2023 në zonën e kompleksit “Oslo”, por Leonard Zejno, tashmë në kërkim ishte vetëm organizator dhe jo financues i këtyre dy vrasjeve të mbetura në letër.
Të paktën kështu del nga dëshmia e bashkëpunëtorit të Drejtësisë, Amarildo Nikolli, i arrestuar në muajin Gusht 2023, në përgatitje e sipër për të vrarë Inez Hajrulla.
Ora News ka raportuar e para për arrestimin dhe pendimin tek organet e Drejtësisë Shqiptare të vrasësit me pagesë Amarildo Nikollit nga qyteti i Shkodrës.
Nikolli tregon se Leonard Zejno, ishte vetëm një organizator i punës në Shqipëri për të kryer dy vrasjet, megjithëse inatin dhe etjen për tu hakmarë e kishte me mikun e Inezit, Ervis Matodashaj.
Ndërkohë që njeriu që kërkonte patjetër ekzekutimin e Inez Hajrulla dhe do paguante shumën financiare prej 250 mijë euro ishte një shqiptar që jetonte në Dubai.
Por bashkëpunëtori i Drejtësisë Amarildo Nikolli, nuk është në gjendje ta identifikonte këtë person, pasi ky individ i Dubait, kishte dalë vetëm në bisedat që Nikolli ka kryer me Leonard Zejnon, djalin e xhaxhait të tij, dhe asnjëherë nuk është shfaqur drejtpërdrejt apo qoftë dhe në telefon.
Mbase ky personazh mund të mos ekzistojë fare dhe mund të jetë një individ i krijuar nga vetë Leonard Zejno në bisedat spontane që kryente me Amarildo Nikollin, për ta bindur këtë të fundit se pagesat për vrasjen e hasmit e tij ishin të garantuara. Vetëm duhej që shkodrani të tërhiqte këmbëzën.
Më 22 mars 2013, tre persona qëlluan me breshëri automatiku një makinë në hyrje të autostradës Levan-Vlorë. Objektivi i këtij atentati ishte një person tjetër, por i plagosur rëndë mbeti 23-vjeçari Erigert Zejno.
Zejno u plagos dhe ndërroi jetë dy javë më vonë në spital, por objektivi i sulmit sipas policisë ishte shoku i tij.
Lidhur me këtë ngjarje në atë kohë u bë arrestimi i tre personave, ku fillimisht në pranga përfunduan Ervis Matodashaj i njohuri si “Çoke Qorri”, Nadir Ferko i njohur në Vlorë si “Dirushi” dhe Altin Sejdiraj i njohur si “Piriminxhi”.
Por hetimet për këta tre persona të arrestuar u pushuan dhe ngjarja për vrasjen aksidentale të Erigert Zejno, u pezullua nga prokuroria e Vlorës.
Për shkak të kësaj situate, Leonard Zejno, së bashku me djalin e xhaxhait të tij, Erjon Zejno dhe një person tjetër Muharrem Koroveshi, kanë organizuar vrasjen e Inez Hajrulla dhe Ervis Matodashaj, duke kontraktuar shkodranin Amarildo Nikolli.
Ky i fundit fillimisht është paguar 5 mijë euro për shpenzimet operative, i janë siguruar armët, por kontrata përfundimtare për të kryer vrasjen e Matodashaj dhe Hajrulla, është mbyllur kundrejt 500 mijë euro, shumë financiare kjo që nuk u pagua asnjëherë.
Ndërkohë njeriu që ishte kontraktuar për vrasjen, tashmë ka kaluar në dorë të SPAK duke u kthyer si bashkëpunwtor i prokurorisë dhe ka treguar jo vetëm për planin e vrasjes së Matodashaj – Hajrulla, por edhe për një plan vrasje në Lezhë dhe ngjarje të tjera kriminale./Ora News
