Këtë të mërkurë do të finalizohet ekstradimi i parë nga Dubai drejt Shqipërisë. Burime për mediat bëjnë me dije se rreth orës 11:00 pritet të mbërrijë n¥ aeroportin e Rinasit, shtetasi Bruno Çobo.
Ai akuzohet për “Krijim grupi të strukturuar kriminal” dhe “Mashtrim kompjuterik”, në bashkëpunimin. Bruno Çobo ishte pjesë e grupit prej 17 personash të përfshirë në një skemë mashtrimi të qytetarëve italianë nga një call-center në lagjen “Don Bosko” në Tiranë.
SPAK nisi procedimin penal në vitin 2021, pas një hetimi kishte nisur nga drejtësia italiane. Hetimi u shtri në të dy shtetet pasi u krijua një ‘Skuadër e Përbashkët Hetimore’ me Prokurorinë italiane të Pordenones.
Si funksiononte grupi?
Personat kontaktoheshin nëpërmjet telefonit, u propozohej blerja on line e aksioneve “Amazon” me premtimin e pa vërtetë të fitimit të shumave të majme dhe të shpejta. Në momentin që klienti në dijeni pranonte nënshkrimin e investimeve, i dërgohej një e-mail që përmbante një link nëpërmjet të cilit lidheshin për të filluar blerjen e titujve. Në këtë kontekst, viktima shkarkonte sipas udhëzimeve te telefonuesit aplikacionin “AnyDesk”, faktikisht duke i lejuar mashtruesit që të futej si i jashtëm në kompjuterin e tij dhe të marrë kodet e sigurisë të bankës, duke e lejuar për tu futur direkt në numrat e llogarive bankare.
Sipas hetimeve, skema parashikonte që të merrte dhe më shumë para duke i bërë viktimat të besonin se duhej të paguan një lloj komisioni bankar për të marrë në zotërim shumat që ‘fitonin’ nga investimi.
Për të humbur gjurmët, sipas hetimeve, grupi e kryente lidhjen “AnyDesk” në kompjuterat personal të viktimave duke përdorur një server italian të provider-it Aruba, që, sipas SPAK, “garantonte në fakt fshehjen reale të adresës IP nga ku kishte kryer komunikimi, duke bërë serverin si nyje të vetme për të gjitha komunikimet”.
Hetimi nisi nga autoritetet italiane në shtator 2020 pas kallëzimit të një shtetasi italian, i cili kishte rënë pre e mashtrimit duke ‘investuar’ në këtë skemë 700.000 euro.
Hetimet kanë bërë të mundur konstatimin dhe atribuimin grupit kriminal, të episodeve të shumta mashtrimi të kryera ndaj personave me banim në të gjithë territorin e Italisë, të cilat i kanë dhënë grupit kriminal një fitim total prej rreth 4.7 milionë euro, që dyshohet se është vetëm një pjesë e vogël e shumës së përfituar nga grupi si rezultat i kësaj veprimtarie kriminale.
