Nga Boldnews.al
Prej afër gjysmë viti, vetëm normalitet nuk ka në institucionin më të lartë të vendit, siç është Parlamenti. Opozita proteston për të drejtat e mohuara që janë ngritja e komisioneve hetimore parlamentare; bashkëryetari në Reformën Zgjedhore dhe e drejta e zgjedhjes së kreut të grupit parlamentar. Që të trija këto të drejta ligjore i janë mohuar me “kundraligje” dhe arrogancë të frikshme të kreut të qeverisë, i cili tashmë nuk fshihet aspak në betonimin e autokracisë.
Paradoksi është se ditët e fundit mazhoranca është “ofruar për zgjidhje”, teksa ka pranuar se ka negociata dhe mund të shkojnë në ndonjë marrëveshje. Me një ligj kontrovers, i cili de facto mbyt opozitarizmin, Rama dhe deputetët e tij të bindur i hoqën të drejtën opozitës që të kërkojnë ngritjen e komisioneve hetimore parlamentare. Po ashtu, në një tjetër rast tërësisht të paprecedent, mazhoranca cakton se kush duhet të jetë kryetar i grupit Parlamentar të PD-së, apo edhe atë të bashkëkryetarit në komisionin e Reformës Zgjedhore.
Shtrëngimin e fortë të lakut e bëri pikërisht në situatën e rëndë që opozita po kalon me veten dhe Rama ishte aty për ta varrosur përgjithnjë, duke i hequr edhe atë pak zë që kishte në Parlament. Me strategji të mirëmënduar, ndërmori hapa revanshi ndaj thelbit të demokracisë, kjo edhe më një dorë ledhatuese nga një factor ndërkombëtar që është në krizë të fortë morale dhe me konflikte të armatosura sa në Europë ashtu edhe në Lindjen e Mesme. Teksa në vend qytetarët i degdis çdo ditë në emigrim dhe opozitën nën thundër, Rama merrej me drafte politike për “paqe nëpër botë” dhe samite ndërkombëtare sa për imazh personal.
Po ashtu kryeministri e ka fundshpinën e mbrojtur me Gjykatën Kushtetuese, e cila duhet të ishte mbi palët por shumica e anëtarëve të saj kanë “ngatërruar” derën e PS-së me atë të Kushtetueses, duke shërbyer për Ramën edhe më shumë sesa një patronazhist fshati, militant i thekur i së majtës.
Thuhet se palët janë në negociata, por interesante janë lëvizjet e Ramës për tu deshifruar… Paralelisht me gjoja “negociatat” me opozitën Parlamentare, ai bën sikur lëshon dhe kthehet në një politikan të matur, gjithëpërfshirës dhe respektues i pakicave politike. E tillë ishte edhe mbledhja me përfaqësues të pushtetit lokal, ku morën pjesë edhe kryebashkiakë të djathtë. Kreut të qeverisë vetëm tespiet i mungonin për tu treguar si “mullai I madh” i një klani fisnor, që ofron paqe edhe më kundërshtarët.
Nga ana tjetër opozita e paforcë për të reaguar do të mjaftohet me ndonjë lëshim të lehtë të lakut që ia shtrëngon Rama, me kusht që ky i fundit të duartrokitet edhe nga ndërkombëtarët se është aq “demokrat” se nuk të mbyt për krejt… Laku është përsëri në duart e Ramës që mbëstetet nga e ashtëquajtura drejtësi e re dhe një enturazh ndërkombëtarësh që me këtë vend të vogël pa pikë peshe mjafton të ketë disi stabilokraci, pasi demokracia kishte 22 vite që lëngonte rëndë dhe tashmë mbush 11 vite që ka vdekur!
