Janë zbardhur detaje të reja nga ngjarja e rëndë e regjistruar mbrëmjen e djeshme në qendër të Frosinones në Itali, ku u regjistrua një përplasje me armë mes bandave shqiptare.
Një viktimë është i konfirmuar tashmë, ndërsa mediat fqinje nuk janë të qarta në lidhje me viktimën e dytë, ku disa prej tyre raportojnë ai ai ka ndërruar jetë gjatë një operacioni, ndërsa disa të tjera nuk e kanë raportuar ende këtë gjë. Po ashtu kanë mbetur të plagosur edhe dy persona të tjerë.
Së fundmi, raportohet se është arrestuar një 23-vjeçar shqiptar si dhe janë shpallur në kërkim tre persona të tjerë.
Policia italiane beson se është i riu, i cili ka qëlluar me armë zjarri ndaj 4 bashkëkombasve të tij. Prokuroria e akuzon atë për veprën penale të vrasjes me paramendim dhe vrasjes së trefishtë të mbetur në tentativë. Hetuesit kanë identifikuar edhe tre personat e tjerë që ndodheshin me të dhe aktualisht janë në kërkim.
Fillimisht sherri mes dy bandave rivale shqiptare nisi brenda Shake Bar, një lokal mjaft i frekuentuar nga të rinjtë në zonë. Më pas të dy grupet u përballën me njëri-tjetrin në rrugë.
Viktimat ishin ulur në një tavolinë në restorant, ndërsa dy prej tyre mbërritën me një automjet tip “Lancia” pak para orës 19:30 dhe filluan të debatojnë me ta. Pas disa debatesh, njëri person tjetër doli nga makina, nxori një armë dhe qëlloi me shpejtësi disa herë, duke goditur të katër personat në tavolinë.
Njëri prej shqiptarëve mbeti i vdekur në vend, ku bëhet fjalë për një 27-vjeçaer shqiptar, të cilin e kapi një plumb në qafë. Ndërsa, tre të tjerët u plagosën në bark dhe në këmbë dhe u dërguan me urgjencë në spital, ku më vonë disa media raportuan se dhe njëri prej tyre kishte ndërruar jetë.
Raportohet se autori ka qëlluar 4 ose 5 herë me një pistoletë të kalibrit 22. Pas krimit, autorët braktisën në vendin e ngjarjes automjetin tip “Lancia Ypsilon” dhe u larguan në këmbë.
Ende nuk dihet identiteti i viktimave dhe të plagosurve, si dhe i të arrestuarit. Gjithashtu, ende nuk dihet as motivi, por po hetohet pista e një përplasje për kontrollin e territorit të trafikut të drogës.
Për ngjarjen reagoi edhe kryebashkiaku i Frosinones i cili tha se ishte i shokuar nga krimi i rëndë që ndodhi në lokalin më të frekuentuar nga të rinjtë e qytetit.
“Jam i shokuar, nuk mund të them asgjë. Për mua kjo që ndodhi është e pashpjegueshme. Është një plagë për të gjithë qytetin. Mund të konfirmoj që nesër në mëngjes do të flasim me prefektin”, tha Riccardo Mastrangeli.
Policia është duke vijuar hetimet për të rindërtuar dinamikën e plotë të kësaj ngjarje të rëndë që ka shokuar opinionin vendas.
