Policia e Korçës ka arrestuar një person të katërt në kuadër të operacionit “Again” të ekzekutuar tre ditë më parë, ku u kap 51 kg lëndë narkotike kanabis në pikën doganore të Kapshticës.
Ditën e sotme është vënë në pranga shtetasi Endri Pani, 43 vjeç, banues në Korçë. Sipas autoriteteve policore, ai akuzohet si bashkpunotpr i 42-vjeçarit Julian Suljoti.
“Nga veprimet intensive hetimore të kryera për zbardhjen e kësaj ngjarjeje, rezulton se ky shtetas, është bashkëpunëtor me shtetasin Julian Suljoti, i cili u ndalua në Pikën Kufitare të Kapshticës, në tentativë për të trafikuar me automjetin e tij, drejt Greqisë, 51 kg lëndë e dyshuar narkotike cannabis sativa.” – thuhet në njoftimin e Policisë.
Julian Suljoti u arrestua tre ditë më parë në doganën e Kapshticës, pasi kishte fshehur në shasinë e automjetit tip “Audi Q7” që e drejtonte vetë, 51 kg kanabis, të ndarë në pako, që dyshohet se do e trafikonte në drejtim të Greqisë.
Si bashkëpunëtorë të tij u arrestuan dhe shtetasit Endri Merolli, 28 vjeç dhe Stelio Suljoti, 24 vjeç, banues në Korçë. Autoritetet policore bënë me dije se ata ishin në hetim prej 1 viti nga uniformat blu.
Ndërkohë, Policia sekuestroi edhe një armë zjarri pistoletë tip “Zastava”, e cila u gjet gjatë kontrollit të ushtruar në një fabrikë riciklimi për vajrat e automjeteve, në pronësi të shtetasit Julian Suljoti.
Nga ana e Policisë po vijon puna për vënien para përgjegjësisë ligjore të personave të tjerë të implikuar në këtë veprimtari kriminale.
Materialet procedurale i kaluan Prokurorisë së Korçës për veprime të mëtejshme
