Në ngjarjen e djeshme pranë shkollës 9-vjeçare në Rrilë të Lezhë, pati shkëmbim zjarri. Ky është konkluzioni i hetimeve të deritanishme, që ka çuar në arrestimin e të plagosurit dhe shpalljen në kërkim të tre personave të tjerë.
Agron Puka u plagos një ditë më parë me armë teksa ishte në bordin e automjetit të tij tip “Audi”. Ndaj tij u qëllua disa herë me armë zjarri, me 54-vjeçarin që përfundoi në spital, ndërsa autorët u larguan nga vendngjarja.
Veprime hetimore në vendngjarje dhe këqyrja e kamerave të sigurisë çuan hetuesin në përfundimin se mes të plagosurit dhe tre personave në kërkim pati shkëmbim zjarri.
Me arritjen në këtë përfundim, policia arrestoi Agron Pukën në spitalin e Lezhës, ku po merr mjekim dhe nga bluzat e bardha raportohet se ndodhet jashtë rrezikut për jetën. Ndaj tij rëndojnë akuzat për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe i municionit”.
54-vjeçari, “nga hetimet rezultoi se ka qëlluar në drejtim të 3 shtetasve, me armë zjarri pistoletë, të cilën e mbante pa leje”, njoftoi policia. Arma me të cilën dyshohet se Agron Puka kreu qitjen është sekuestruar.
Ndërkohë personat e shpallur në kërkim të akuzuar se qëlluan ndaj 54-vjeçarit janë Vincens Tuku, 32 vjeç, banues në fshatin Tale, Amarildo Kola, 31 vjeç, banues në fshatin Tale dhe Kevin Ndoka, 18 vjeç banues në Shëngjin.
Ndaj tyre janë ngritur akuzat për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe i municionit”.
“Nga hetimet rezultoi se këta shtetas, për shkak të një konflikti të mëparshëm për motive të dobëta, kanë tentuar të ndalojnë automjetin me të cilin lëvizte shtetasi A.P. (Agron Puka) dhe më pas kanë qëlluar drejt këtij automjeti, me armë zjarri”, sqaron policia.
Sipas burimeve policore, disa ditë më parë, 54-vjeçari dyshohet se është konfliktuar fizikisht me të paktën një prej të shpallurve në kërkim.
