Është mbyllur koha e rregullt mes Vllaznisë dhe Erzenit, ndeshje e vlefshme për fazën çerekfinale të Kupës së Shqipërisë.
Shkodranët arritën të fitonin 2-1 në shtëpi, dhe duke marrë parasysh fitoren me të njëjtën rezultat të shijakasve në Rrogozhinë skuadrat i drejtohen shtesave për të përcaktuar skuadrën gjysmëfinaliste.
Për sa i përket ndeshjes së sotme, të parët që kaluan në avantazh ishin vendasit. Në minutën e 13’, Gruda ka dërguar nga fundorja e majtë një top drejt qendrës dhe Mala nuk ka gabuar përballë portës.
Ndërkohë në minutën e 39-të, Erzeni ndëshkohet me të kuq duke luajtur me 10-të lojtarë.
Pas një faulli ndaj Grudës, arbitri fillimisht akordon karton të verdhë për Atandën por gjyqtari Orlando Kuka sinjalizohet për të parë pamjet me VAR.
Pasi verifikon pamjet, ai anulon të verdhin që kishte dhënë më parë dhe jep të kuq për Atandan, pasi e vlerëson si lojtar të fundit duke i hequr mundësinë e shënimit të golit Grudës.
Kuqeblutë përfituan nga superioriteti numerik duke dyfishuar me anë të Bekim Balajt në fundin e pjesës së parë. Mala gjen një korridor i cili nis Balajn drejt portës dhe ky i fundit nuk gabon i vetëm para Hasanbellit.
Por shijakasit edhe pse me një lojtar më pak nuk u dorëzuan teksa në minutën e 63’, ka qenë një autogol i Stojanoviç që çoi takimin në shtesë.
