Qeveria ka emëruar një zv.ministër për ministrinë e Ekonomisë, Kulturës dhe Inovacionit, të krijuar së fundmi dhe që drejtohet nga Blendi Gonxhja. Bëhet fjalë për Sokol Duman, teksa vendimi është marrë në mbledhjen e sotme të Këshillit të Ministrave.
Sokol Duma ka qenë një vartës i Blendi Gonxhes tek Drejtoria e Përgjithshme e Shërbimeve të Transportit Rrugor (DPSHTRR), teksa tani vihet sërish nën urdhërat e tij si zv.ministër i Ekonomisë, Kulturës dhe Inovacionit.
Sokol Duma ka mbajtur postin e Këshilltarit për Sigurinë Rrugore në Kabinetin e Drejtorisë së Përgjithshme të Shërbimeve të Transportit Rrugor.
Vlen të theksohet fakti se më 24 Janar, Qeveria emëroi në postin e zv.ministres së Ekonomisë, Kulturës dhe Inovacionit edhe Lira Pipën, një tjetër ish-vartëse të Blendi Gonxhes.
Lira Pipa, para se të emërohej zv.ministre, prej vitit 2019 kishte mbajtur postin e Drejtorit të Kabinetit në Drejtorinë e Përgjithshme të Shërbimeve të Transportit Rrugor.
Siç duket, Blendi Gonxhe po e kthen Ministrinë e Ekonomisë, Kulturës dhe Inovacionit në një oaz për ish-vartësit e tij.
Kujtojmë se bashkimi i ministrisë së Ekonomisë me atë të Kulturës është pritur me kritika ana e opozitës, po ashtu edhe emërimi i Blendi Gonxhes në krye të kësaj ministrie, një bashkëpunëtor i vjetër i kryeministrit Edi Rama.
Duhet theksuar dhe fakti se emri i Blendi Gonxhes është lakuar shpesh për afera korruptive nga denoncimet e opozitës, por edhe raportimet mediake të cilat kanë zbuluar se si me kompaninë “Albarent”, ai ka përfituar qindra milionë para publike në procedeura tenderuese.
Gjithashtu, tenderat e DPSHTRR-së të ankimuar në Komisionin e Prokurimit Publik ngrenë dyshime për procedura të paracaktuara e korruptive nga Blendi Gonxhe. Një vit më parë, ai ishte në qendër të kritikave pasi u shfaq si mbrojtjes i një nisme që parashikonte rritjen me më shumë se dyfish të çmimit të patentës.
lendi Gonxhe është një prej bashkëpunëtorëve më të vjetër e më të ngushtë të kryeministrit Edi Rama. Në vitin 1998, kur ish-kreu i qeverisë, Fatos Nano, e mori Ramën nga emigrimi në Paris dhe e emëroi në krye të Ministrisë së Kulturës, Blendi Gonxhe u emërua shef i tij i kabinetit. Më tej, Rama e mori Gonxhen si zëvendës të tij në Bashkinë e Tiranës, në vitin 2002. Blendi Gonxhe u largua me dorëheqje, pas përmbytjes së “Tiranës së Re” nga një hapje e gabuar e digës së Liqenit Artificial.
Pas disa vitesh në aktivitet privat, Blendi Gonxhe rikthehet në Bashkinë e Tiranës, kësaj radhe si vartës i Erion Veliajt. Ai qëndroi për tre vjet në postin e drejtorit të Agjencisë së Parqeve dhe Rekreacionit dhe në vitin 2018 u emërua nga kryeministri Edi Rama në postin e Drejtorit të Përgjithshëm të Shërbimit të Transportit Rrugor.
