Një 24-vjeçar, i shpallur në kërkim për vrasje është vetëdorëzuar në Policinë e Shkodrës këtë të martë.
Policia sqaron se, bëhet fjalë për shtetasin Klodian Mhilli, i cili akuzohet si autori i dyshuar për vrasjen e Valter Fjerzës, ngjarje e ndodhur vitin e kaluar.
Mhilli është dënuar nga Gjykata e Shkodrës me burg për vrasje me dashje, armëmbajtje pa leje, si dhe shit-blerje narkotikësh.
“Një 24-vjeçar i shpallur në kërkim për vrasje, është vetëdorëzuar në Drejtorinë Vendore të Policisë Shkodër, shtetasi:
-K. M., 24 vjeç, banues në fshatin Hot i Ri.
Ky shtetas ishte shpallur në kërkim si autor i dyshuar i vrasjes me armë zjarri, të shtetasit V. F., kryer më datë 21.09.2023, në fshatin Hot i Ri.
Prokuroria pranë Gjykatës së Shkallës së Parë të Juridiksionit të Përgjithshëm Shkodër ka dërguar urdhrin per ekzekutimin e vendimit të vitit 2023 të Gjykatës së Shkodrës, e cila i ka caktuar 24-vjeçarit, masën e sigurisë “Arrest në burg”, për veprat penale “Vrasja me dashje”, “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi dhe shitja e narkotikëve”, kryer në bashkëpunim”,- njofton Policia.
33 vjeçari, Valter Fierza, mbeti i vrarë me armë zjarri mbrëmjen e 21 shtatorit të vitit të kaluar pranë Kishës së Hotit të ri në Shkodër.
Burimet bënë me dije se 33-vjeçari u gjet i vrarë jashtë automjetit të tij. Ndërsa dyshohet se shkak për ngjarjen të ketë qënë një konflikt i çastit. Si autor i dyshuar i ngjarjes ishte, 24 vjeçari Klodian Mhilli, i cili është vetëdorëzuar në polici ditën e sotme.
