Djali i Fredi Belerit, ka reaguar pas dënimit me dy vite burg të kryetarit të zgjedhur të bashkisë së Himarës nga drejtësia shqiptare.
Në një prononcim për mediat greke, Petro Beleri, e quajti procesin politik i cili sipas tij bazohet në prova të rreme,, teksa shtoi se beteja ligjore do të vazhdojë në Gjykatën e Apelit.
Ai thekson në të njëjtën kohë se tashmë fjala i përket palës greke, e cila duhet të marrë iniciativat e nevojshme që drejtësia të triumfojë.
“Ky vendim i shërben 100% qëllimeve të qeverisë shqiptare, në një kohë kur të gjitha argumentet e tyre janë rrëzuar. Duan të na çojnë sërish në zgjedhje, por çfarë kuptimi do të kenë kur përpiqen me çdo mënyrë të pengohet kryetari i zgjedhur ligjërisht? Tashmë qeveria greke duhet të marrë një qëndrim të qartë. Të gjithë himariotët janë të vendosur. Sot jashtë gjykatës ishin 100 persona, plus ata që ishin brenda në sallë. Bëhet fjalë për një gjyq historik me zhvillimin më negativ për palën greke. Ne do të vijojmë me qëndrimin tonë të civilizuar dhe do të luftojmë deri në fund”, u shpreh Petro Beleri.
