Do të ekstradohet drejt Shqipërisë 55-vjeçari Gëzim Çela, i konsideruar si “Baroni i Drogës”, i cili u arrestua më 8 Dhjetor të vitit të kaluar, në fshatin Dardani të Ferizajt në Kosovë, në kuadër të operacionit të koduar “Fundi i trishtë”.
Lajmin për ekstradimin e Gëzim Çelës e ka konfirmuar Ministria e Drejtësisë, e cila bën me dije se ai do të ekstradohet me proces të thjeshtuar, pasi ka dhënë vetë pëlqimin për t’u ekstraduar drejt Shqipërisë.
GJKKO ka caktuar masën e sigurisë “arrest me burg” ndaj tij, për operacionin “Flakë në det” të ekzekutuar në muajin gusht të vitit të kaluar, teksa akuzohet për veprat penale “Trafikimi i narkotikëve”, kryer në bashkëpunim, në kuadër të grupit të strukturuar kriminal dhe “Kryerja e veprave penale nga organizata kriminale dhe grupi i strukturuar kriminal”. Baza e Gëzim Çelës ishte Fushë Kuqja e Kurbinit.
Gjithashtu, ai është dënuar me 10 vjet e 8 muaj burgim nga ish-Gjykata e Krimeve të Rënda për veprat penale “Trafikimi i narkotikëve” dhe “Prodhimi dhe mbajtja pa leje e armëve dhe municione luftarake”. Po ashtu, në vitin 2012, autoritetet gjyqësore italiane e kanë dënuar me 19 vjet, 9 muaj e 29 ditë burgim, për kryerjen e veprave penale “Organizator i migrimit ilegal” dhe “Organizatë kriminale për shfrytëzim prostitucioni”, parashikuar nga Kodi Penal i Italisë.
Gëzim Çela fshihej në fshatin Dardani të Ferizajt, në banesën e shtetasit nga Kosova me inicialet A.I. Ky i fundit dyshohet se e ka strehuar për një kohë të gjatë në banesën e tij Gëzim Çelën. Për t’i shpëtuar arrestimit “baroni i drogës” përdorte identitetin Bekim Bajraktari.
Policia e Kosovës raportoi se përveç shtetasit me iniciale A.I, Gëzim Çela në momentin e arrestimit ka qenë i shoqëruar dhe me dy femra nga Shqipëria. Gjatë kontrollit të banesës, uniformat blu i gjetën dhe një armë zjarri automatik AK-47 me 15 fishekë.
Njoftimi i Ministrisë së Drejtësisë:
Shtetasi Gezim (Gëzim) Çelaj alias Çela, i biri i Xhemal dhe i Fatime, lindur më 07.04.1968, në Krujë, do të ekstradohet nga Kosova në Shqipëri.
Ekstradimi i tij do të bëhet me procedurë të thjeshtuar, dhe në vijim të komunikimit mbi këtë kërkesë për ekstradim, Ministria e Drejtësisë të Kosovës, me emailin e datës 26.02.2024, ka përcjellë njoftimin e autoriteteve kosovare të drejtësisë mbi vendimin Nr. 05179662, dt. 11.01.2024 të Gjykatës Themelore në Ferizaj/ Kosovë, për lejimin e ekstadimit të thjeshtuar këtij shtetasi, për shkak se ky shtetas ka dhënë pëlqimin për t`u ekstraduar drejt Shqipërisë.
Kërkesa për ekstradimin e shtetasit të lartpërmendur bazohet në:
-Vendimin Nr. 110, datë 08.10.2023 të Gjykatës së Posaçme të Shkallës së Parë për Korrupsionin dhe Krimin e Organizuar, për caktimin ndaj tij të masës së sigurimit “Arrest në burg”, për kryerjen e veprave penale “Trafikimi i narkotikëve” e kryer në bashkëpunim, në formën e grupit të strukturuar kriminal “Grupi i strukturuar kriminal” dhe “Kryerja e veprave penale nga grupi i strukturuar kriminal”, parashikuar nga nenet 283/a, 28, 333/a dhe 334 të Kodit Penal të Republikës së Shqipërisë.
-Vendimin Nr. 102, datë 30.09.2015 të Gjykatës së Shkallës së Parë për Krime të Rënda Tiranë, i ndryshuar me Vendimin Nr. 121, datë 07.12.2015, të Gjykatës së Apelit për Krime të Rënda për dënimin e tij me 10 vjet e 8 muaj burg, për kryerjen e veprave penale “Trafikimi i narkotikëve”, e kryer në bashkëpunim, “Prodhimi dhe shitja e narkotikëve”, kryer në bashkëpunim dhe “Mbajtja pa leje dhe prodhimi i armëve, armëve shpërthyese dhe i municionit”, parashikuar nga nenet 283/a/2, 2283/2, 278/3 të Kodit Penal të Republikës së Shqipërisë.
