Partia Demokratike denoncoi këtë të shtunë se në Bashkinë e Pogradecit të drejtuar nga Ilir Xhakolli i PS po shpërdorohen fondet publike.
Në një deklaratë nga selia blu, zëdhënësja e anti-korrupsionit në PD Genta Vangjeli tha se përgjatë vitit 2023 bashkia Pogradec ka kryer disa transaksione të cilat mund të konsiderohen si shpenzime luksi.
Këtu ajo përmendi 1.527.012 lekë për qira ambientesh, 2.951.819 lekë për honorarë, 7.313.033 lekë shpenzime për ekzekutim të vendimeve gjyqësore për largim nga puna dhe 8.725.602 lekë shpenzime kompensimi për anëtarët e parlamentit dhe zyrtarë të tjerë të zgjedhur
“I konsiderojmë shpenzime luksi, sepse Pogradeci është një bashki ku evidentohen përqindje shumë e ulët e realizimit të investimeve, pasi fondet kryesisht mbulojnë pagat e një administrate të tejfryrë”, theksoi.
Vangjeli shtoi se shkelja e madhe ndodh te pagat e punonjësve, ku sipas saj zbulohet korrupsioni dhe favorizimet. Pagat neto për punonjësit e Bashkisë të miratuar në organikë kapin vlerën 170.073.822 lekë, tha, ndërsa pagat neto e punonjësve të Bashkisë me kontratë të përkohshme mbi numrin organik kapin vlerën 140.297.929 lekë.
“Sipas Vendimi të Këshillit Bashkiak nr.144, datë 28.12.2022 numri i punonjësve me kontratë të përkohëshme në bashkinë Pogradec për vitin 2023 është 65, dhe nr i përgjithshëm është 760. Sipas të dhënave të Drejtorisë së përgjithshme të Tatimeve paga neto për 760 punonjesit e miratuar në organikë viti 2023 ishte 170.102.022 lekë ndërsa Paga neto e punonjësve me kontratë të përkohshme mbi numrin organik 140.297.929 lekë”, deklaroi Vangjeli.
“Vini re: 82% e vlerës që paguhet për 760 punonjës shkon për kontrata të përkohshme. Kjo strukturë punësimesh ku një e dhjeta e punonjësve absorbon 78 përqind të shumës së alookuar për pagat flet qartë për mënyrën se si kryebashkiaku i Pogradecit shpërblen ‘të vetët’, njerëzit e partisë dhe patronazhistët, dhe denigron pjesën më të madhe të të punësuarve. Ky disnivel nuk dëshmon gjë tjetër veçse faktin se këto janë pagesa për qoka dhe shpërblime të kryetarit”, theksoi ajo.
Ajo solli në vëmendje dhe rezultatet e një raporti auditimi të KLSH-së në Bashkinë Pogradec gjatë periudhës 2020-2021 dhe publikuar në Korrik 2022.
“Duke rekomanduar që Titullari i Bashkisë Pogradec, të marrë menjëherë masa për rishikimin e strukturës së punonjësve me qëllim eliminimin e strukturave të panevojshme, uljen e numrit të punonjësve dhe për rrjedhojë uljen e shpenzimeve për paga, si dhe të rishikojë kontratat e lidhura në vitet e mëparshme me burim financimi të ardhurat Bashkisë Pogradec”, citoi raportin.
“Kjo është qeverisja lokale e Rilindjes për të cilët disa janë të nënës parti e shumica të njerkës”, përfundoi.
