Deputeti i Partisë Demokatike, Ervin Salianji i ftuar në News 24, foli në lidhje me protestën e opozitës së bashkuar dhe personave të ftuar.
Sa takon faktit nëse kishte apo jo një ftesë për Lulzim Bashën, Salianj tha me ironi se ftesa ka qenë për të gjithë opozitarët, por Basha sipas tij është një ndihmës i qeverisë dhe kush është në qeveri nuk ftohet. Ai e cilësoi Bashën si tradhtar të interesave të demokratëve dhe shërbyes të Ramës.
“Basha është përfaqësuesi me i denjë i tradhtisë së interesave të demokratëve dhe shërbyesi më i denjë i Edi Ramës. Për të gjithë ata që kanë ndodhur në parti, ai duhet të tërhiqej dhe të mos e merrte peng partinë. Unë nuk mendoj se i bëhet ftesë personave që janë në qeveri, sepse ata nuk të japin asnjë votë. Basha është ndihmës i qeverisë” – tha Salianji.
Në lidhje me bashkimin e opozitës dhe krijimin e federatës, Salianji tha se është gjithçka drejt finalizimit, ndërsa ajo që mungon sipas tij është mënyra për të integruar në parti të gjithë ata që kanë investuar me vite dhe tanimë nuk ke kanë mundësinë të kontribuojnë për shkak të konfliktit të brendshëm.
“Në këndvështrimin tim në PD duhet gjetur mënyra për të integruar të gjitha ata njerëz që kanë investuar me vite në PD, të cilët për shkak të këtij konflikti të brendshme nuk kanë mundur të integrohen” – shtoi ai.
Në lidhje me tërheqjen nga rendi i ditës i “Aministisë Penale”, Salianji tha se erdhi për shkak të prishjeve të pazareve mes mazhorancës dhe Lulzim Bashës. Ai shtoi se në projektligjin për Amnistinë ka pasur shumë ndryshime një ditë më parë. Salianji e cilësoi si të gabuar propozimin e Bashës që kërkonte që të përfshiheshin në ligj protestuesit e dënuar në një periudhë 3 vjeçare, pasi sipas tij nuk duhet të ketë përjashtim.
“Duhet të kishte diskutim me opozitën për të parë kategoritë që duhet të përfshiheshin. Tani duhet parë nëse do të vazhdohet të ketë një interes personal. Dje projektligji ka pasur ndryshime rrënjësore dhe nuk na është dhënë. Unë kam bërë një amendament, i cili nuk është marrë parasysh. Nuk mund të ketë kriter përjashtues për protestuesit me vite. Logjika e opozitës duhet të jetë që të mos ketë përjashtime tek protestuesit dhe ai i Bashës nuk është i saktë. Duket qartë se ka një pazar të prishur dhe nuk u arrit të votohet sot. Detyrim i Kuvendit që të lehtësojë barrë e familjarëve për personat e dënuar për vepra jo të rënda. I vetmi që ka hyrë në logjikë pazari ka qenë Basha dhe po hyrë në këtë logjikë do të marrësh kostot. Amnistia është e bllokuar edhe për shkak të tij. Basha e kishte detyrim të ulej me kolegët e tij, të diskutonte dhe të dilnim me propozime të përbashkëta konkrete. Ky nuk ulet me deputetët e opozitës, por e bën me deputetët e Ramës.” – tha Salianji.
