Deputeti i Partisë Demokratike, Bledion Nallbati i ftuar në Syri TV, ka deklaruar se, mazhoranca e mashtroi sërish Lulzim Bashën, në lidhje me amnistinë penale, ku pretendon se ja kanë parqitur si një “pazar” mes grupit Berisha-Bardhi dhe mazhorancës.
Ai shtoi më tej se Ndreca e ka ndryshuar amendamentin e tij, dhe e ka propozuar si amendament i PD-së. Nallbati deklaroi se, opozita do të vazhdojë aksionin e saj nesër në Kuvend, ashtu siç ka bërë muajt e fundit, dhe nuk do të votojnë amnistinë penale.
“Mesa duket edhe këtë radhë, si në çdo përpjekje për të bërë një marrëveshje, nuk po e quaj pazar, por marrëveshje, ata e mashtruan prap. E futën në kurth, e përdorën dhe e mashtruan prap. Unë kam propozuar ndryshime ne nenin 1, 2, 3 dhe asnjë ndryshim në nenin 5, që ka të bëjë me barazimin e faljes mes burrave dhe grave, në bazë të kushtetutës. Ky ka qenë synimi. Ishte parashikuar që të ishte 3 vite burrat për 4 gratë, e propozuan 4 për burrat dhe 5 për gratë. Në këto kushte unë parashikuar që të gjithë ata persona që janë dënuar nga 4 vite e poshtë të përfitojnë uljen respektive. Nuk e kanë pranuar dhe votuar amendamentin tim, Plarent Ndreca ndërtoi një amendament të vetin. Mori një pjesë nga propozimi im, një pjesë nga propozimi i Alibeajt dhe tha se, ky është propozimi i Nallbatit. Në fakt aty u votua amendamenti i Ndreçës. Ne do të vijojmë me aksionin që kemi nisur, nuk mund të tërhiqemi nga kërkesat legjitime për komisionet parlamentare dhe komisionin e reformës zgjedhore.”, tha Bledion Nallbati
