Janë regjistruar tensione mes besimtarëve brenda xhamisë “Dine Hoxha” në Rrugën e Kavajës.
Sipas mediave, myftiu i Tiranës, Laurent Luli është ofenduar nga besimtarët myslimanë, të cilët kanë tentuar ta përzënë nga xhamia Sikurse duket në videon e mëposhtme, përplasja ka qenë e ashpër, ndërsa një lumë ofendimesh kanë vërshuar drejt myftiut.
“Gylenist, terrorist, nuk je myfti, je pushtues i pozicionit të myftiut, nuk të duam, je gylenist”, janë fjalët fyese ndaj myftiut të Tiranës.
Kjo situatë ndodh në një kohë kur kryeministri Edi Rama ndodhet për një vizitë zyrtare në Ankara dhe presidenti turk Recep Tayyip Erdogan, gjatë konferencës për mediat i përsëriti kërkesën e vjetër, “pastrimin e Shqipërisë nga organizata FETO”, duke iu referuar mbështetësve të filantropit Fethullah Gylen.
“Pjesë e agjendës sonë ishte dhe pastrimi i mbetjeve të FETO në Shqipëri, e cila vazhdon aktivitetet e saj me qëllim për të hedhur hije mbi marrëdhëniet tona. Ne nuk do të lejojmë që kjo t’ia arrijë objektivat e saj dhe po ashtu ne shikojmë që edhe autoritetet shqiptare janë të vetëdijshme për këtë. Lufta jonë me këtë strukturë do të vazhdojë dhe falënderoj për kontributin që ka dhënë në arsim fondacioni turk Maarif në Shqipëri”– theksoi Erdogan.
Vlen të theksohet faktri se për shkak të kësaj të kërkese të Erdogan, po mbahet “peng” hapja e xhamisë së Namazgjasë, e financuar nga Turqia. Edhe pse ka përfunduar, ajo ende nuk është inaguruar, pasi Erdogan i ka vënë si kërkesë Ramës, pastrimin e komunitetit mysliman nga gylenistët.
