Ka nisur protesta e thirrur nga opozita para kryeministrisë kundër qeverisë së drejtuar nga Edi Rama.
Masive është prezenca e qytetarëve, të cilët kërkojnë dorëheqjen e kryeministrit Edi Rama.
Për gazetarët në terren, ata shprehën pakënaqësitë për qeverinë.
“Duhet të iki qeveria mesa i ka ndodh këtij vendi kohë kohë, asnjëherë ska ndodhur”, tha një qytetar.
“Unë jam nga Librazhdi. Jemi këtu kundër korrupsionit. Kryeministri duhet t’i thërrasë mendjes. Arresti për Berishën është i padrejtë. Dhëndri ka marrë thjesht pronat e veta. Kjo është padrejtësi që i bëhet Berishës nga kryeministri”, tha një protestues.
Një tjetër qytetar u shpreh se është në shesh për të protestuar kundër keqqeverisjes së vendit dhe korrupsionit. “Jam nga Kombinati. Si përherë pres të jetë paqësore. Jemi kundër keqqeverisjes së vendit”, tha ai.
Mesazhet e protestuesve kundër qeverisë janë shfaqur edhe përmes pankartave.
“Protesta është e qytetarëve. Duhet të ketë disa protesta që pluralizimi të mbijetojë. Sot përmbyset miti i diskutuarës shqiptare”, deklaroi deputeti demokrat Tomorr Alizoti jashtë selisë së PD-së, para se ti bashkohej protestuesve të tjerë para kryeministrisë.
Nënkryetari i PD-së, Flamur Noka dhe kreu i grupit parlamentar Gazment Bardhi kanë paralajmëruar pjesëmarrje masive dhe një protestë paqësore.
Gjatë protestës së sotme, folës së ndryshëm, kryesisht figura të njohura të PD-së pritet të mbajnë fjalime në një podium të ngritur para zyrës së shefit të ekzekutivit.
Një fjalim i kryedemokratit Sali Berisha pritet të transmetohet gjithashtu.
Ende nuk ka një orar të saktë se kur do të përfundojë protesta.
Një numër i konsiderueshëm i forcave policore janë në terren të pozicionuar kryesisht te kryemistria dhe përreth.
Ndërkohë, kryeministri Edi Rama ndodhet jashtë vendit, në një vizitë zyrtare në Turqi.
