Lideri i opozitës Sali Berisha, nga dritarja e banesës së tij, fton çdo shqiptar ti bashkohen protestës së 20 shkurtit për një betejë pa kthim kundër regjimit që bazohet në krimin, vjedhjen e shqiptarëve, drogën, shkatërrimin e Shqipërisë dhe shqiptarëve.
Berisha deklaron se Edi Rama po e ndan pasurinë me klanet e krimit dhe e ka shndërruar Tiranën në lavatriçen më gjigante të drogës dhe krimit në botë. Ai shton më tej se nuk gjendet asnjë qytet tjetër në botë që të ketë 50 mijë apartamente bosh dhe çmimet vetëm të rriten.
“Sot shqiptarët janë një komb, nuk them në zhdukje, por pothuajse në zhdukje. Në 10 vite më shumë se 1/3 e tyre janë larguar nga Shqipëria.
Dy janë largimet më të mëdha të shqiptarëve nga kjo tokë në kohërat e reja.
Largimi i vitit 1990, kur ata u takuan me lirinë, por përjetonin dhimbjet e tmerrshme të tiranisë së mjerimit dhe u nisën e vërshuan për të lehtësuar ato dhimbje në dhera të tjera. Kurse largimi i dytë vjen këto 10 vite si pasojë e instalimit gradual të një të keqe të madhe, të një diktature të re, në të cilën çdo ditë vritet shpresa e tyre.
Në të cilën atyre u dëshmohet se vullnetin e tyre e kontrollon qeveria.
Në të cilën atyre u dëshmohet se pasuritë publike janë pasuri e qeverisë për ti vjedhur dhe shpërdoruar.
Në të cilën atyre u dëshmohet se droga është preokupimi kryesor i pushtetit.
Në të cilën atyre u faktohet se krimi është sundimtari i vërtetë i Shqipërisë.
Të gjitha këto janë një apel i madh për çdo shqiptar.
Janë një apel për ata që përmbysën një diktaturë.
Ngrihuni se ju njihni më mirë se kushdo tjetër të zezat e diktaturave. Ngrihuni sepse ju përjetuar varfëri dhe mjerim, se në paranojën e tij Enver Hoxha shndërronte pasuritë në bunkerë dhe tunele.
Kurse sot përsëri nuk begatoni, jeta juaj përkeqësohet sepse Edi Rama transporton me avionin e tij, me 140 fluturime në 18 muaj, shumat përrallore të parave tuaja.
Sepse Edi Rama sikur të mos ekzistoni kërkon të përvetësojë miliarda me portin e Durrësit.
Sepse Edi Rama ndërton 1 kilometër rrugë me 20-24 mln euro, ndërkohë që të tjerët e ndërtojnë me 1-2 mln euro.
Sepse Edi Rama ndan pasurinë me klanet e krimit.
E ka shndërruar Tiranën, qytetin e bekuar, në lavatriçen më gjigante të drogës dhe krimit në botë. Ja kalon dhe Bogotas dhe qyteteve të Amerikës Latine.
Nuk ka qytet tjetër në të cilin, nuk gjindet qytet tjetër në botë që të ketë 50 mijë apartamente bosh dhe çmimet vetëm të rriten.”- thotë Berisha.
Lideri i opozitës deklaron më tej se mafia më e fuqishme e botës u kontraktua për të shkatërruar opozitën shqiptare.
“Mafia më e fuqishme e botës u kontraktua për të shkatërruar opozitën shqiptare. Qeveria me në krye kryehajdutin e kombit bëri gjithçka që vendi të jetë pa opozitë, por të gjitha dështuan. Sot opozitë jeni ju, opozitë janë qindra mijëra shqiptarë të cilët”, tha ai.
Berisha thotë se SPAK-u po mbron krimet horror që qeveria Rama po kryen me vjedhjet e njerëzve më të varfër në Europë, shqiptarët.
Berisha deklaron se prej më shumë se 3 muajsh janë kapur të gjitha biseda e firmës ‘5D’ në grupin e Whatsapp. Ai tregon më tej se në këto biseda kryebashkiaku i Tiranës, Erion Veliaj, jep urdhra të prerë se sa duhet të vjedhin vartësit e tij në tendera.
Lideri demokrat thotë se kreu i SPAK, Altin Dumani, nuk po bën asgjë për të ndalur vjedhjet e Veliajt.
“Prej mëse 3 muajsh janë kapur të gjitha biseda e firmës ‘5D’ në grupin e Whatsapp
Në këto biseda Erion Veliaj jep urdhra të prerë, vidhni kaq dhe vidhni aq, merrni kaq dhe merrni aq me tendera, bëni këtë dhe bëni atë.
Çfarë bën Dumani?
Është bërë avokat i tij. Skapi mbron krimet horror që këta qeveritarë kryejnë me vjedhjet e njerëzve më të varfër në Europë.
Revolta dhe vetëm revolta qytetare është fjala dhe duhet të jetë fjala jonë.”- deklaron Berisha.
