Presidenti i Francës, Emmanuel Macron, ka uruar homologen e tij, Vjosa Osmani, për 16-vjetorin e Pavarësisë së Kosovës.
Përmes një letre, Macron thotë se Kosova ka bërë përparime të mëdha që nga shpallja e Pavarësisë, 16 vite më parë.
Po ashtu, ai tha se java e ardhshme do të jetë vendimtare për zbatimin e marrëveshjes së Ohrit dhe i kërkoi autoriteteve të Kosovës që të marrin vendime të guximshme.
“Unë shpresoj që Kosova të marrë vendimet e guximshme që janë të nevojshme dhe që do t’i mundësojnë të përparojë në trajektoren e saj evropiane”, thuhet në letrën e Macronit, dërguar Osmanit.
Më tej, Macron tha se derisa lufta e agresionit nga Rusia po vazhdon në Evropë dhe stabiliteti i Lindjes së Mesme po kërcënohet seriozisht, normalizimi i marrëdhënieve mes Kosovës dhe Serbisë përben një sfidë parësore.
