Është zbardhur dëshmia e 35-vjeçarit Ilir Koçilja, e dhënë për grupin hetimor, i cili një ditë më parë vrau me thikë fqinjin e tij Halil Kokën, në lagjen nr. 4 të qytetit të Durrësit.
Sipas Koçiljas, shkaku i sherrrit mes tyre ka qenë një vend parkimi, para hyrjes së pallatit të autorit. Ai thotë se nuk shkonte mirë me viktimën dhe i kishte kërkuar që të mos e parkonte makinën aty dhe disa herë i kishte gërvishtur makinën.
Pasi i kishte gërvishtur makinën, Ilir Koçilja pretendon se viktima Halil Koka e ka kërcënuar me fjalët “Do të vras, do të fus në bagazh” dhe se pas këtyre fjalëve e qëlloi me thikë.
“Me Halilin ishim fqinj. Nuk shkonim mirë me njëri-tjetrin. Ai linte makinën te hyrja e pallatit. I kisha thënë disa herë që mos ta linte aty se pengonte qytetarët që të kalonin për të shkuar në shtëpi. Kur i thashë mos e lër më makinën aty, ai më ofendoi. S’i ktheva përgjigje. Kur dola ditën tjetër e pashë makinën, po prapë të parkuar aty. Nga inati, ia gërvishta me thikë në pjesën e derës se pasagjerit dhe ika. Prapë ditën tjetër e kishte lënë aty dhe unë prapë ia gërvishta. Erdhi më kapi një ditë dhe më tha ti e ke gërvishtur makinën time . Po i thashë “unë ta gërvishta”. Mos e lër më aty i thashë. Aty debatuam, kush je ti, kush jam unë. Nisi të më kërcënonte. Do të vras, do të fus në bagazh. Unë e kisha thikën me vete. E pashë që doli nga lagja në rrugë kryesore. Iu afrova dhe i thashë “ti do më marrësh zvarrë mua dhe do më futesh ne bagazh”. Ai më shau. Aty m’u errësuan sytë dhe e qëllova me thikë. Më pas u largova dhe u fsheha për disa orë te lagja 11 deri sa më kapet ju. Nuk e dija se kishte vdekur. Mendova se e plagosa. Nuk kam asnjë konflikt tjetër me atë. As i kisha borxh para dhe as më kishte. Me vjen shumë keq për atë që ndodhi, jam penduar. Po konfliktin e nisi Halili”, ka deklaruar ndër të tjera Ilir Koçilja.
