Edi Paloka kërkoi angazhim nga të gjithë deputetët demokratë për protestën e 20 Shkurtit.
“Këmbëngul edhe njëherë të them është se detyra jonë, e deputetëve, Këshillit Kombëtar, të gjithë strukturave të PD është që në 20 shkurt të sigurojmë pjesëmarrjen më të madhe që kemi arritur ndonjëherë”, tha kreu i Këshillit Kombëtar të PD-së nga selia blu, para mbledhjes së kësaj strukture.
Paloka vlerësoi edhe bashkimin e deputetëve demokratë pas dy vitesh në selinë blu, në mbledhjen e grupit parlamentar demokrat.
“Grupi parlamentar zhvilloi takimin e parë në selinë e PD, pas kaq kohësh. Duket një formalitet, por jam i bindur se për të gjithë ne është një arritje pas gjithë andrallave dhe vështirësive që kemi kaluar si PD. Është një hap i madh, drejt asaj që duam të arrijmë sa më shpejt, bashkimin e gjithë strukturës së PD dhe vënien në funksion jo vetëm të 20 shkurtit, por të fitores së zgjedhjeve të ardhshme. Se në fund të fundit synimi ynë kryesor është rrëzimi i këtij regjimi dhe fitorja në zgjedhje”, u shpreh ai.
Tani që Sali Berisha është në kushtet që është, shtoi, na takon të bëjmë 10 herë më shumë ne të tjerëve dhe jo të ulim kokën.
“Na duhet të dhjetëfishojmë punën tonë që në 20 shkurt ti tregojmë kujtdo, atyre që janë brenda dhe që mund të vijnë nga jashtë, se ne nuk pajtohemi më me diktaturën. Le ta mbështesë kush të dojë, le ti interesojë kujt të dojë, ta mbajë Ramën si diktator në Shqipëri ne nuk mund të pajtohemi me këtë, përndryshe hajde të ikim të gjithë në shtëpitë tona dhe ta mbyllim këtë histori”, theksoi Paloka.
