Grupi Parlamentar i Partisë Demokratike ka përfunduar mbledhjen dhe kanë shpërndarë detyrat për protestën e 20 shkurtit.
Në mbledhjen me dyer të mbyllura, se të gjithë deputetëve u është kërkuar që të shpërndahen në terren të informojnë qytetarët dhe të organizojnë takime për të pasur sa më shumë pjesëmarrje në tubimin kombëtar.
Nga ana tjetër, nga deputetët e Rithemelimit u është kërkuar të gjithëve që të qëndrojnë edhe në mbledhjen e Këshillit Kombëtar, për të dhënë mesazhin e bashkimit edhe në këtë forum.
Hapjen e kësaj mbledhje e bëri deputeti Flamur Noka i cili tha se bashkimi i deputetëve të grupimit Berisha-Bardhi kanë përçuar mesazhin e saj.
“Kemi një shembull referimi kur punojmë bashkë dhe organizohemi siç është protesta e 7 Korrikut. Tani puna kapilare pas mbledhjes së strukturave. Bashkimi ka dhënë mesazh tek demokratët. Kemi vetëm 8 ditë para protestës. Me të gjithë deputetët duhet të bëjmë takime në qendrat e degëve”, mësohet të ketë thënë ai.
Myslim Murrizi tha gjatë fjalës së tij, se të përçarë po vijojnë të mbeten pas me programin e opozitës duke kujtuar se ndërkohë që Rama po nis fushatën për 2025 ndërsa demokratët ende nuk e dinë nëse do mund të futen në zgjedhje.
Pas Murrizit ka folur kryetari i Këshillit Kombëtar, Edi Paloka i cili tha se të gjithë deputetët do të jenë në bazë e do ecin për qëllimin e përbashkët madhor.
“Të gjithë deputetët pa përjashtim do jemi në bazë. Të gjithë kemi mëkatet tona në politikë, por na takon të ecim bashkë për qëllimin madhor”, tha ai.
Deputetët Tritan Shehu dhe Luan Baçi kanë propozuar që ish-kryeministri Sali Berisha të jetë pjesë e protestës së 20 shkurtit përmes teknologjisë.
Sipas Baçit, Berisha duhet të ketë një fjalë para mbështetësve demokratë ditën e protestës.
Lindita Metaliaj ka theksuar se protesta e 20 shkurtit nuk duhet të jetë një pasarelë dhe se qytetarët nuk duhet të dëgjojnë fjalimet e më pas të shpërndahen, por sipas saj duhet të ketë “përballje dhe betejë”.
Kjo e hënë solli mbledhjen në selinë blu pas dy vitesh të shumicës dërrmuese të deputetëve demokratë.
