Nga Boldnews.al
Një raport i Shërbimit të Kontrollit të Brendshëm të Burgjeve, i hartuar së fundmi dhe i rrjedhur në media sugjeronte se “burgu i sigurisë së lartë i Peqinit ëstë kthyer në një hotel.
Ky raport u hartua menjëherë pasi i burgosuri me burgim të përjetshëm, Sokol Mjacaj, vrau me armë zjarri brenda qelisë të dënuarin tjetër, Arben Lleshi.
Raporti paraqiste të dhëna skandaloze, se si “të fortët e burgut” kishin siguruar qeli më vete, se si hyrja e sendeve të palejuara ishte shndërruar në normalitet.
Po ashtu, tregohej për festa private të 20-30 të burgosurve me burgim të përjetshëm, shndërrimin e ambjenteve të përbashkëta në palestra “private”, ku të burgosurit duhet të paguanin deri në 100 euro për shfrytëzimin e saj dhe të tjera shkelje të rënda.
Ky raport tronditi sistemin e burgjeve. Por, nga ana tjetër, nuk e ka shqetësuar aspak Avokatin e Popullit. Madje, jo vetëm kaq, por titullarja me mandat të përfunduar e këtij institucioni, Erinda Ballanca, i mohoi gjetjet e raportit të Shërbimit të Kontrollit të Burgjeve, struktura më e specializuar për verifkimet në ambjentet e Institucioneve të Ekzekutimit të Vendimeve Penale (IEVP).
Ballanca ishte e ftuar këtë të enjte në studion e “Opinion” të Blendi Fevziut, ku u diskutua mbi situatën e mbipopullimit të burgjeve.
Gazetari Spartak Koka risolli në vëmendje raportin e Shërbimit të Kontrollit të Brendshëm për burgun e Peqinit, si një nga pasqyrat reale të situatës në atë institucion të sigurisë së lartë, ku vuajnë dënimin me burgim të përjetshëm mbi 100 persona.
Në mënyrë tërësisht të habitshme, të dhënat e raportit u kundërshtuan nga Avokatja e Popullit, Erinda Ballanca.
Ajo e konsideroi raportin të mbushur me të pavërteta. Këtë bindje e mbështeste në faktin se inspektorët e Avokatit të Popullit kanë kryer verifikime në burgun e Peqinit dhe nuk kanë konstatuar situatë të rënduar, siç prezantohet në raportin e vetë Burgjeve.
Ballanca deklaroi se nuk u konstatua “dhoma teke” për të burgosur të veçantë, nuk u panë palestra personale, të drejtat e të burgosurve respektoheshin në masë më të madhe. Gjithashtu, ajo vijoi më tej se nuk u gjetën sende të palejuara, përveçse ndonjë ekspresi kafeje, që nuk i prish punë askujt.
Një mbrojtje të tillë do ta kishin zili edhe autoritetet më të lartë të Ministrisë së Drejtësisë, përfshirë ministrin Ulsi Manja dhe drejtorin e përgjithshëm të Burgjeve, Admir Abrija.
Por, këta dy zyrtarë të lartë, megjithëse jo hapur, i kanë pranuar problematikat e mprehta në burgje dhe, nisur nga pozicioni i tyre, kanë bërë atë që ishte më logjike në këtë rast-kanë premtuar përmirësimin e situatës.
Atë mbrojtje që nuk e bënin dot Manja dhe Abrija, ua ofroi “falas” Avokatja e Popullit, Erinda Ballanca.
Është e paqartë se për cilën arsye Ballanca e reshtoi veten në një pozicion të tillë, duke kundërshtuar me forcë gjetjet problematike të vetë Burgjeve.
Erinda Ballanca vijon detyrën si Avokate e Popullit, ndërkohë që mandati i saj 5-vjeçar ka përfunduar në maj të vitit 2022.
Parlamenti për më shumë se një vit e gjysëm nuk ka arritur të zgjedhë Avokatin e ri të Populli, duke i zgjatur Ballancës qëndrimin në detyrë për një kohë të pacaktuar.
Ndoshta kjo “tolerancë” e maxhorancës socialiste e ka nxitur Erinda Ballancën që të marrë një rol “më katolik se Papa” për të mbrojtur paligjshmërinë në burgje, shumë më fort se sa u duhet ta bënin titullarët e Drejtësisë dhe të Burgjeve.
