Ish-kryetarja e Kuvendit, Jozefina Topalli ka qenë e pranishme mbrëmjen e kësaj të enjte në protestën poshtë banesës së kreut të PD-së Sali Berisha, në mbështetje të këtij të fundit pas masës së vendosur ndaj tij “arrest shtëpie”.
Gjatë fjalës së saj para demokratëve, Topalli bëri thirrje për pjesëmarrje në protestën që do të organizohet më 20 shkurt, një protestë kombëtare e organizuar nga Partia Demokratike. Ajo shtoi më tej se aksioni opozitar ka nisur me rezistencë, por do të vazhdoje deri në rebelim, derisa të vijë ndryshimi.
“Prania juaj këtu ka vërtetuar që jo vetëm nuk shkrihet PD dhe opozita, por përkundrazi ka mobilizuar cdo qelizë. Mbi të gjitha se ne shqiptarët edhe kur heshtim flasim, ne nuk ulim kokën sepse njohim mirë pasojat e diktuarave. Këta e filluan duke marrë vulat. Në cilin vend të botës, ndodh që kryetari i një partie ne opozitë të caktohet me vendim gjykate. Ne Evropë jo, as në Afrikë. Më 20 shkurt të gjithë sëbashku të dalim për të mbrojtur të drejtat tona. Ndaj duhet kurajë duhet vendosmëri, ka filluar me rezistencë do vazhdojë me protestë dhe do shkojë në rebelim derisa gjërat të ndryshojnë”, tha ndër të tjera Topalli.
